Xabier Otaegi: «Txiste kontalaria baino, txiste zurrupatzailea naiz»

1994ko otsailaren 06a
Xabier Otaegiri elkarrizketa ETBn egiten duen lanari buruz
Xabier Otaegi: «Txiste kontalaria baino, txiste zurrupatzailea naiz»

Txirri izenez ezagutzen dute haur guztiek, baina Xabier Otaegi da BBVk Donostiako Amaran duen sukurtsalean. 22 urte beteko ditu aurten beste bi lagunekin Txirri, Mirri eta Txiribiton pailazoen proiektua martxan jarri zuenetik. Haur guztien onespena eureganatzea lortu dute. Gazteenengana ere heltzea dute helburu ETBn beteko duten etapa berrian.
ARGIA. Zer sentitzen da Euskal Herriko pailazorik pailazoena izatean?
XABIER OTAEGI. Horiek al gara gu? Ez dakit. Inoiz ez dugu pailazoegi izanaren zentzu handiegirik. Naiz eta urte asko eraman honetan, oraindik ez zait gertatu horrelakorik.
A. Hala ere, Txirri da itxuraz serioena.
X.O. Guapoena.
A. Zu ere serioa al zara?
X.O. Ez dut uste. Hori nahiko subjetiboa den arren, alaia naizela uste dut.
A. Banku-langilea, txistularia eta matematika irakaslea, hirurak pailazo. Ez al da barregarria?
X.O. Horregatik bildu ginen. Inongo arazorik gabe eramaten dugu. Hasierako planteamentua ez zen goizeko lanari beste bat gehitzea. Euskararengatik hasi ginen, ez profesional izateko. Euskal Herri honetan haurtxoentzat zerbait behar zelako. Gero, urteak pasatu ahala, bilakaera izan du.
A. Zertan izan da bilakaera hori?
X.O. Oso zaila litzateke zehaztea. Baina ez da iraultzarik egon, garapena baizik. Kalitatearen aldetik gero eta gehiago jotzen dugu, batez ere gero eta telebistagarritasun handiagoa eman nahian.
A. Zerbait ere galduko zenuten horretan.
X.O. Garai bateko freskotasuna. Ilusioa ez. Agian garai bateko entusiasmoa. Gaztetan izan dezakezun jarrera gal dezakezu. Alde guztietatik ona dela uste dut. Azken batean esperientzian irabazten dugulako. Gure lana mediora egokitzen ikasi dugu.
A. Rap bat ere kantatzen duzue.
X.O. Hori demasa da. Oso kuriosoa izan da. Batipat nire kasuan, kantagintza tradizionalean mugitu izan naizelako. Rock bat kantatzea beste urrats bat zen, baina rap-arena jauzi koalitatibo nabarmena izan da. Hasieran ez genekien zer ahots jarri, zer egin... Gero, lehen aldian asmatzea nahikoa dela konturatu gara.
A. Charlie Rivel ala Fofo?
X.O. Bakoitza bere neurrian. Charlie Rivel oso gogoko dut, eta Fofok, inguruan zituenekin konparatuta, ona zirudien.
A. Charlot edo Harold Lloyd?
X.O. Charlot.
A. Txiste ordenagailu horietako bat al zara?
X.O. Normalean txiste kontalari fama jartzen digute, baina kontalari baino gehiago, zurrupatzailea naiz. Jende askok kontatzen dizkit, baina oraintxe ez naiz gogoratzen.
Amagoia Iban
63

Gaiez\Komunikabid\Telebista\ETB\Aktoreak
Gaiez\Kultura\Antzerkia\Pailazoak
Pertsonaiaz\OTAEGI4
Egileez\IBAN1\Kultura
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak
Azkenak
EGILEA
Eguneraketa berriak daude