«Hemen badirudi abertzaleak erreserba bateko indioak bihurtzen ari garela»

1993ko abuztuaren 01an

Floren Aoiz , HBko kideari elkarrizketa
«Hemen badirudi abertzaleak erreserba bateko indioak bihurtzen ari garela»
Floren Aoiz, HBren bozeramailea:
Gaztea bada ere, badaramatza urte batzuk politikagintzan murgildurik. Jarrai erakundean ibilia, bi legegintzaldi egin ditu jada Nafarroako Parlamentuan diputatu eta azken aldian HBren bozeramaile lanetan dabil. Euskal politikagintza ere oporretan jarri den honetan bere lanaren eta orokorrean euskal politikaren alde batzuk ukitu ahal izan ditugu, ekainean igarotako hauteskundeen itzala oraindik ere guztien buruetan dagoenean.
ARGIA. Bozeramailea beti izaten da beste alderdi zein komunikabideen jopuntua. Ohitu al zara egoera honetara?
FLOREN AOIZ Bai, azken batean hasi baino ere lehen badakizu hori horrela izango dela. Eskaini zidatenean lana onartu nuen eta banekien. Hala ere, ohitzea zaila da. Beste alderdien borezamaileak beste modu batera tratatzen dituzte; HBren bozeramailea diskriminatua dago.
A. Gazte izateagatik diskriminazio hori areagotu egiten al da?
F.A. Askotan. Politika hemen nahiko itxita dago, beste alderdietan betiko jendea dabil. Gazte bat sartzen denean, gaitasunik ez duela azaldu nahi da. Nik hauxe bizi izan nuen EAJrekin izan genituen elkarrizketetan, haiek mukitsu bat nintzela uste zuten. Beste alderdietan ez dira konturatzen gauza asko aldatu direla, nahiko ahulduta daudela eta gazte jendeak ere zerbait esan behar duela.
A. Askotan aipatu izan da zure gaztetasuna eta horrekin batera belaunaldi berria datorrela. Zuk zer berri dakarkiozu HBri?
F.A. Ez nik bakarrik, nire adineko jendeak beste modu batera ikusten dugu politika eta dena. Batzuk frankismoaren kontra aritu ziren borrokan; guk, aldiz, ez dugu hori bizi izan eta beste modu batera ikusten ditugu herria, ideia sozialak eta borroka. Nire ustez, gure ikuspuntua lotuago dago gaurko errealitatearekin. Batzuek ortodoxia ordezkatzen dugula diote, gazteenak garela itxienak. Hau ez da horrela, gazteenok gaurkotze prozesu bat suposatzen dugu. Ezinbestekoa da gainera.
A. Hauteskundeei dagokienez, PPk adibidez, igoera handia izan du. Beldurra ematen al dizu igoera honek?
F.A. Beldurra baino kezka. Hemen abertzale eta ezkerrekoak garenok ez genuen uste boto espainolista hain indartsu aterako zenik. Bat-batean konturatu gara ez dela jaitsi eta igo egin dela. Prozesu bat ematen ari da eta prozesu honetan eskuinti eta espainolistak indartsuago sentitzen dira, gero eta erosoago. Abertzale eta ezkerrekoek, berriz, beren helburu politikoak defenditzeko ahalmenak murritzagoak ikusten dituzte. Donostian, adibidez, Odon Elorza, espainolista amorratua izanik, inoiz baino argiago hitz egin eta probokaziotan sartzen da. Donostian eta Euskal Herrian badirudi abertzaleak erreserba bateko indioak bihurtzen ari garela. Hau oso serioa da. Ezkerreko edo abertzaleak bihurtuko gara, nolabait, indioak, eta besteek benetan kontrola izango dute.
A. Azken urteetan garrantzi handia eman diezue hauteskundeei, azterketa moduan ere planteatuz. Instituzioetara joaten ez den alderdi batentzat ez al da hau oso arriskutsua?
F.A. Ez dakit zein puntutaraino den hori horrela. Garrantzia ematen diegu hauteskundeetako emaitzei. Ez da benetako argazki bat, baina termometro bezala uler daiteke, neurri batean behintzat. Beharrezkoa da hauteskundeetan parte hartzea. Hala ere, hauteskundeetatik ateratzen diren emaitzak erlatibizatu egin behar dira. Errealitate sozial bat ere badago, mugimendu sozialen inguruan, eta hori ez dute beti hauteskundeek adierazten. Ezker abertzalearen esparrua hauteskundeetako emaitzekin soilik neurtzea ez zait zilegi iruditzen.
A. Baina hauteskundeei ematen zaien garrantzia ez al da mugimendu sozialen kontrakoa?
F.A. Hau sistema honen funtzionatzeko eraren ondorio da. Ez da soilik hauteskundeetan ikusten, eguneroko bizitzan ere alderdiek dena egiten baitute. Alderdiek badute paper bat baina badaude beste elementu oso inportanteak, eta hauek herri mugimenduak dira. Hauei bide bat eman behar zaie nahi dutena defenditzeko. Gu saiatzen gara, agian askotan okertzen bagara ere. Egoerari buelta emateko beharrrezkoa da HB gero eta indartsuagoa izatea, baina batez ere herri borroka gero eta indartsuagoa izatea. Indar koerlazioa ez baita soilik alderdi politikoen arabera zehazten.
A. Nola manten daiteke oreka hori?
F.A. Zaila da oreka mantentzea, baina hori lortzeko bide asko daude. Alde batetik, ziurtatu behar da ez dutela alderdi politikoek erantsiko gizartean dagoen indar guztia, bakoitzari bere bitartekoak mantentzen utzi behar zaio. Tirabirak beti egongo dira, baina uste dugu gainditzen ari garela eta oreka mantentzen saiatzen ari garela. HB indartsu bat bilakatu daiteke herri mugimendua bultzatzeko tresna bat.
A. Aipatu izan duzu Ipar nahiz Hego Euskal Herriko ezker mugimendu abertzaleak ez oso epe luzean batzeko aukera emango dela. Baina alde bietako egoera ikusirik ez al zaizu hau oso zaila iruditzen?
F.A. Bai, baina guk tesi bat gainditua daukagu eta ziur gaude Iparraldean ere ganditua dutela. Tesi honen arabera batasuna erritmo edo bide beraren ildotik etorriko litzateke; eta ez dugu uste horrela denik. Batasunak ez du esan nahi bide beretik joango garela, erritmo eta tresna berberekin, hori ez da batasuna. Batasuna desberdintasunak onartuz etorriko da. Batasunerako zenbait pauso ematea posible da etorkizun hurbilean. Alde batetik nahia, borondatea badagoelako, eta bideak nondik nora joan behar duen ikusi dugulako.
A. Jakinak dira zenbait kazetarirekin izan dituzun tirabirak. Zein elkarrizketatan egon zinen deserosoen, ETBn hauteskunde garaian egin zizuten elkarrizketan hala lehenago «El Pais»en egindakoan?
F.A. «El Pais»en egindakoan. Nik horrelako edozein kazetariri ez diot beldurrik zuzenean izatekotan. Zuzenean izanez gero, nahiz eta haiek dena kontrolpean izan, zuk baduzu defenditzeko aukera. Baina «El Pais»ekoek egin zidaten bezalako elkarrizketa batean ez da posible.
A. Zer ikasi duzu elkarrizketa hauetatik?
F.A. Ikasgai bat atera nuen. Alde batetik, manipulazioa oso argi dagoela, baina aldi berean manipulazio hau agerian uztea posible dela, lasaitasuna mantenduz gero.
A. Ajuria Eneko Itunak HBrekiko isolamenduaren aldeko apustua egin duela dirudi. Jasango al du berriro HBk isolamendua?
F.A. Posible da. Ez dakigu zer gertatuko den baina ez gara beldur; lehen ere denetarik egin eta ez dute beren helburua lortu. Egia esan, bilera hori nahiko patetikoa iruditzen zaigu. Saiatuko dira eta agian lortuko dute, oso erraz baitute, komunikabideak alde izanik. Baina eremu politikoan porrot egin du, jendea konturatu delako saldu dioten mezua ez dela bidezkoa. Gero eta zailagoa da Euskal Herrian polizi neurrien bidezko porrotaren ideian sinestea, eta hori da Ajuria Eneko Ituna.
A. Julio Inglesiasen bahiketa dela eta behin eta berriro aipatu izan da HBko kideen bitartekaritza. Ez al zaizu iruditzen hainbeste aldiz entzun ondoren gizarteak berak sinetsi duela zuen bitartekari paper hori?
F.A. Hori Atutxari dagokio. Atutxak esan behar dio Elosegiri nola konpondu arazoa, hori haien arazoa da. Ezker abertzaleko jendea besteetan prest agertu da zenbait mugimendu egiteko, baina era humanitario batean, ez bestelako zentzuan. Hori kriminaltzen baldin badute, ezinezkoa bihurtuko da eta hori aldatzea ez dago gure esku. Beraien esku dago eta benetan laguntzeko borondatez mugitzen den jendeari ahalmen bat ematen diote edo oso zaila izango da ezker abertzaleko edozeinek horretan parte hartzea.
Aitziber Yarza
8-10

GaiezPolitikaEuskal HerrTaldeakAlderdiakHB
PertsonaiazAOIZ1
EgileezYARZA1Politika

Irakurrienak

Matomo erabiliz

Nola landu desirak, aniztasun sexuala edota identitatea 12-18 urteko ikasleekin?

Mikel Garcia Idiakez

Lagunak, adiskideak eta beste hainbat etsai

Gorka Bereziartua

“Gustatuko litzaidake pentsatzea bidea urratu dudala atzetik datozenentzat”

Aimar Gutierrez Bidarte | Aiaraldea

Turismofobia gogoan al duzue?

Eguzki

Hezkuntza komunitateak protestara deitu du Palestinako haur eta nerabeen alde

Gorka Peñagarikano Goikoetxea

Azkenak

2024-05-05 | Olaia L. Garaialde

Euskara okupatu, marisolasteko

Urtez urte eta belaunaldiz belaunaldi hitzak aldatzen doaz, eta horiekin batera hitzen esanahia. Modu asko daude norbere burua izendatzeko: soropil, biziosa, marioker, ez-binario, maritxu, eta beste. Pertsona sexu-genero disidenteen beharrak asetzeko euskara zikintzeaz eta... [+]

2024-05-05 | Xabier Letona Biteri

Peio Ormazabal eta Beñat Aldalur

"Batasun estrategikoa lantzen ari gara Europako Alderdi Komunista sortzeko"

Joan den abenduan aurkeztu zuten Euskal Herriko Kontseilu Sozialista (EHKS), Euskal Herrian Mugimendu Sozialista egituratzea helburu duen alderdia. Europan Alderdi Komunista eratzea dute helburu eta iraultza sozialista gauzatzea. Peio Ormazabalek eta Beñat Aldalurrek EHKS... [+]

2024-05-05 | Amaia Alvarez Uria

Belaunez belaun, egunez egun

Lizar Begoñak eleberri honen aurretik bi poema liburu argitaratu ditu: Aro beilegia (Balea Zuria, 2020) eta Geopardo japoniarrak (Susa, 2022). Hirugarren liburuan ere badira zenbait irudi poetiko trama harilkatzen laguntzen dutenak: hodeiak eta basamortua, metafora gakoak... [+]

2024-05-05

Hinteligentzia

Pedro Sánchezek demokrazia burgesaren egiazko aurpegiaren laztanak gertutik ezagutu dituen aste berean, berezkoa duen antzezle sena galdu barik, bere gobernuko gerra buru Margarita Roblesek esan du gastu militarra handitzea bakearen alde jardutea dela. Gernika bonbardatu... [+]

2024-05-05 | Danele Sarriugarte Mochales

Amador Fernández-Savater. Filosofia pirata

"Gure gizartean desira gutxi dago, eta obedientzia asko agindu neoliberalei"

Martxoaren amaieran Donostiara etorri zen Amador Fernández-Savater bere liburu berria aurkeztera: Capitalismo libidinal [Kapitalismo libidinala]. Bisita labur batek mami handia izan dezake. Madrilera itzuli aurretik elkarrizketatu genuen, harilkatuz politika,... [+]

Eguneraketa berriak daude