Olatz Beobide aktoresari elkarrizketa
Olatz Beobide: "ETB, ezinbestekoa umeengana euskaraz"
Olatz Beobide, aktoresa da berez, baina ETBko 'Bai Horixe' saioan lanean jarri zenetik, komunikabide honetan aritu izan da. Saio horren bidez beste programa batetarako frogak egin zituen eta haurrentzako 'Banan-bana' eko aurkezlea da gaur egun. Teatro munduko lanaz gain, euskal telebistan haurrentzako programetako aurpegi ezagun bat bilakatu da azken aldian.
ARGIA.–Nola ikusten duzu zure saioa?
Olatz Beobide.–Beno, 'Banan-bana' nahiko berezia da pertsona bakarra ni bait naiz eta beste denak fikziozko pertsonaiak direlako. Horregatik nolabaiteko giroa sortu behar da, pertsonaia horiek ez bait dute berezko bizirik. Gero eskulanak egin, margotu, gauzak sortu eta beste hainbat kontu egiten irakasten diet haurrei jolasean, lagunarteko giroan.
A.–Eta zure ustez ETBn, nahiko garrantzi ematen al zaio haurrentzako saioei?
O.B.–Nik ez dut gehiegi ezagutzen alde hori. Ni telebistako langile soil bat naiz, kontratatua, eta ez dakit gehiegi horretaz. Baina uste dut ez dagoela hain gaizki, hor bait ditugu Poli, Marrazki Bizidunak... Nik uste bai ETBkoa dela bai telebista espainiarrakoa dela, haurrek nahiko saio dituztela pantailan. Beno, gero, haurrek telebista itzaltzen ere jakin beharko lukete, baina tira! Hala ere telebistak izan dezake nolabaiteko funtzio pedagojikorik, horretan pentsatua baldin bada. Euskara irakasteaz gain, denbora ondo pasatzen ere lagundu behar du. Adibidez 'Banan-Banan'saioan euskara pedagojikoa irakasteaz aparte, ikuspegi ekolojista batetik zuhaitzak bota, giroa kutsatu eta abar egiten ari garela azaltzen diegu haurrei. Baina beno ezin da ikasgai bat bezala planteatu, bestela egun guztia pasako bait lukete gelan bezala eta hori ezinezkoa da.
A.–Dena den ohartzen zarete beraz, haurrentzako saioek bai hezkuntza eta baita hizkuntza aldetik funtzio garrantzitsu bat joka dezaketeela?
O.B.–Hori bi urtetan halaxe izan da. Gure helburua jendeari euskaraz entzun araztea da, ikuslegoak euskera jaso dezala. Baina askotan arriskutsua izaten da, erakusten dugun euskara haurrentzat gehiegi izaten delako. Kontutan, bi gauza izan behar ditugu, batetik euskara aberats eta polita erabiltzea eta bestetik, lagun arteko giro horretan jendearengandik hurbil egotea. Jendea mintzatzen den bezala hitzegin ahal izan behar zaie haurrei eta horretarako saioan aholkulari bat dugu. Gure taldea emakume talde bat da eta bai hizkuntzaz arduratzen den pertsona hau eta ahotsak jartzen dituztenak ere, neskak dira. Gidoiak idazten dituenak ezartzen ditu kriterio pedagojikoak, zer esan eta nola.
A.–Orain behintzat telebistan jarraituko duzu ezta?
O.B.–Oraingoz antzerkira dedikatzeko denbora ere ba dut, saioak grabatu egiten bait ditut. Bestalde ETBko zuzendaritza saioaz pentsatzen aritu zen eta bira asko eman dizkiote hizkuntza aldetik eman beharreko formari. Halere denok bat gatoz, umeengana iritsi behar dugula euskaraz, errezki.
B. ARTOLA
61
GaiezKomunikabidTelebistaETBSaioak
GaiezKomunikabidTelebistaETBAurkezleak
PertsonaiazBEOBIDE3
EgileezARTOLA3Komunikabid