Iñaki Irazabalbeitiari elkarrizketa.
I. Irazabalbeitia: "EHUk ezin pretendi dezake Euskal Herriko Unibertsitatea izatea"
Iñaki Irazabalbeitia Donostian jaio zen duela ia 32 urte, eta kimika ikasketak egin ondoren Donostiako Fakultatean hasi zen irakasle lanetan. Bertan sei urte eman zituen, Tesi Doktorala egin artean, bitartean Elhuyar-en lanean hasiz, aldizkari tekniko-zientifikoaren zuzendari dugularik egun. Aspalditxo hasi zen UEUn parte hartzen eta azken bi urteotan bertako zuzendari lanetan dihardu.
ARGIA.- Zer harreman ditu UEUk Euskal Herriko beste unibertsitatekin?
IRAZABALBEITIA.–Elkarte autonomoko unibertsitate ofizialarekin ez daukagu harremanik. Saioak izan badira ere orain arte pott egin dute. Pertsonal mailan berriz erlazio ezin hobeak ditugu, bertako irakasle asko gaure irakasle ere bada eta. Bestalde, EHUk ontzat ematen du UEUk egiten duen lana, oraintsu agiri batetan adierazi ziguten moduan.
Nafarroako Unibertsitate Publikoarekin ere harremanetan sartu berri gara. Erretoregoarekin egon gara eta espiritu onean aritu ziren haiek, baina ezer konkretatu gabe. Lehenengo kontaktuak baino ez dira izan; kontutan hartu behar da beraiek oraindik martxan hasi gabe daudela. Urrian hastekoak dira eta ordurako gelditu ginen, erretoreak irakasle bat jarriko zuela geurekin harremanak gauzatzeko. Nik uste Nafarroako Unibetsitateari utzi egin behar zaiola bere burua lurrean ondo kokatzen eta orduan hasi behar dela elkarlanean.
A.–Zer eskein diezaioke UEUk Unibertsitate ofizialari?
I.I.–Ba berak egin ezin dituen hainbat gauza; euskaraz Udako Ikastaroak antolatzea, ze EHUk erderaz antolatzen ditu. Baita zera ere, geure mintegitan jendea formatzea, beren buruak trebatzea euskaraz eskolak ematen hasteko, baita plataforma ere, unibertsitateko konpartimentu estankotan dagoen jendeak elkar ezagutzeko; arlo ezberdinetako irakasle zein ikasleei komunikaziorako aukera eskeintzen diegu. Bestalde, UEUk berak sortutako testugintza eskeintzen dio, Unibertsitate Ofizialean erabiltzeko. Gaur egun, unibertsitate ofizialean euskaraz dauden testu liburu gehienak UEUren bidez publikatuak dira, edo bestela Elhuyarrek; beraz oso gertutik dena.
A.- Ze problema dituzue erakunde mailan UEU eta UPVren artean?
I.I.–EHUk nahiko luke UEUk Iruñean antolatzen dituen ekitaldien antzekoak antolatzea, baina ez du biderik ikusten. UEUk garbi dauka egiten duena ez dela EHUren konpetentzia, ezin duelako izan, besterik ez bada egituragaltik. UEU ez da inoiz etorkizuneko Euskal Unibertsitatea izango. Faktore bat izango da, akuilu gisa eraginez, gainean egonaz... Baina Euskal unibertsitatea lortzen dugunean ere UEUk iraungo du, edo UEUren antzeko plataformak. Unibertsitate guztiek dituzte udako ikastaroak, eskaintza kulturala, funtzio soziala dutenak.
Bestalde, EHUrekin ez gara segi beharreko bidetan ados jartzen; bakoitzak bere independentzia gorde nahi du, bere modura funtzionatu. Eta UEUk Euskal Herri osoa hartzen du, EHUk zati bat baino hartzen ez duenean. Ezin pretendi dezake, egin izan duen moduan, Euskal Herriko unibertsitatea dela, ze hemen beste unibertsitate asko dago, Nafarroakoa, Deustukoa, Iparraldekoa... UEUrekin harremanetan jarri zirenean, geuk segi beharreko bideak planteatu nahi izan zituzten, diru truke. Ez genuen zilegi ikusi; nola edo hala UEUren antolakuntzan parte hartu behar badu, unibertsitate guztiek hartu beharko dute.
XABIN MAKAZAGA
59
GaiezGizarteaIrakaskuntzUnibertsitaEHUIrakasleakBesteak
GaiezGizarteaIrakaskuntzUnibertsitaUEU
PertsonaiazIRAZABALBE1
EgileezMAKAZAGA2Gizartea