Maien piramide bat suntsitu du eraikuntza enpresa batek Belizen

  • Maien piramiderik garrantzitsuenetariko bat suntsitu du aurreko astean hondeamakina batek Ertamerikako Belize estatuan, Karibeko kostaldean. Piramidetik ateratako hartxintxarra errepideak eraikitzeko baliatu dute.

Lide Hernando @lidehernando
2013ko maiatzaren 21a
2.300 urte baino gehiago zituen piramideak (argazkia: rt.com)

Piramideak 2.300 urte baino gehiago zituen. Noh Mul izeneko konplexu historikoaren parte zen –izenak “muino handia” esan nahi du–, eta hondar prehispaniko bezala erregistratu ziren 1897an. Maiak bertan urte luzez egon zirela frogatu ahal izan da zenbait indusketa arkeologikoren bidez: hezurrak, itxura antropomorfikoko eskulturak eta ontziak aurkitu dira.

Belizeko Arkeologia Institutuko zuzendari Jaime Awek Associated Pressi esan dionez, muino formako piramidearen erdiko zatia bakarrik utzi dute zutik. Albisteak haserrea eragin du aditu eta arkeologoen artean, hondeatzaileen jabe zen enpresak erakutsi duen “ezjakintasun eta sentikortasun eza” dela eta.

Enpresak piramidea deskuiduan eraitsi izana ezinezkoa dela uste du Awek. Eraikuntzak 30 metroko altuera zuen, eta ezin zuen muino natural bat izan, inguruko paisaia laua delako. Bestalde, Noh Muleko hondarrak Belizen oso ezagunak direla dio arkeologoak.

Belizeko legeek, hondar prehispaniko guztiak Estatuaren babespean daudela diote. Estatuko polizia kasua ikertzen ari da eta, ziurrenik, enpresaren aurkako karguak aurkeztuko dituela adierazi du.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Belize  |  Arkitektura  |  Ingurumena

Belize kanaletik interesatuko zaizu...
Azkenak
EGILEA
Eguneraketa berriak daude