Lurra eta kontzejuak defendatzeko deia egin du Araba Bizirik plataformak

  • Arabako makroproiektuen aurka urriaren 23rako deitutako manifestaziorako hilabete falta denean, Araba Bizirik plataformak "laguntza eta elkartasuna" erakutsi die kontzejuei, enpresa handien "presioaren" eta erakundeen "interes faltaren" aurrean.

Araba Bizirik plataformaren prentsaurrekoa, Elorriagan (Argazkia: Araba Bizirik)
Artikulu hau CC BY-SA 3.0 lizentziari esker ekarri dugu.

2021eko irailaren 15an - 10:45
Azken eguneraketa: 12:52

Hainbat makroproiekturen aurkako mugimenduek osatzen dute Araba Bizirik plataforma: AHTrik Ez plataforma —Abiadura Handiko Trenaren aurkakoa eta gaur egungo trenbide sareak erabiltzearen aldekoa—, Arabako Mendiak Aske —lurraldeko mendietan eraikitzekoak diren zentral eolikoen aurkakoa—, Elikadura Iraunkorraren Aldeko Mugimendua —negutegi erraldoien aurkakoa eta elikadura sistema jasangarrien aldekoa— eta Proiektu Honi Ez —Solariak Duran eraiki nahi duen parke fotovoltaiko erraldoiaren aurkakoa—.

Gaur egun abian dauden proiektu horiek gelditzea eta "landa zein natura inguruneak babestea" exijitzeko manifestazio handia deitua dute urriaren 23rako, 18:30ean Gasteizko Bilbo plazatik, Lurra defendatuko dugu lelopean. Astearte honetan, kontzejuen egoera baloratzeko prentsaurrekoa egin dute Arabako Kontzeju Elkartearen egoitzan (Elorriagan).

Arabako naturagune babestuak, arriskuan

Agerraldian gogorarazi dutenez, EAEn dauden naturagune babestuek Araban dute hedadurarik handiena, eta horien kontserbazio baldintza onak, "neurri handi batean", ingurune horiek duten izaera publikoagatik mantendu izan dira urteetan zehar. "Baita lurraldeko herriek landa jardueraren tutoretza, kontserbazio eta oreka mantentzen arrakastaz egin izan duten lanagatik ere", azpimarratu dute.

Hala ere, plataformaren ustez, azpiegitura handiek "ingurune naturalarekiko koexistentzia eta errespetu eredua arrisku larrian jarri dute". Izan ere, proiektu horien eraginpeko eremuetan ondorioak "itzulezinak" izan daitezke biodibertsitatean, paisaian eta baita nekazaritzan zein abeltzaintzan ere.

Kontzejuekiko errespetua

Testuinguru horretan, enpresa handiek Araba osoko kontzejuetan aurkeztu dituzte beren proiektuak. Araba Bizirik plataformak salatu du horrek "presio handia" eragin duela haiengan, eta, gainera, horren aurrean, lurraldeko erakundeak "enpresekin lerrokatu" direla kasu batzuetan, "edota ez du ezertxo ere egin beste batzuetan".

Kontzeju asko proiektu horien aurka agertu dira, eta plataformak erabaki hori publikoki eskertu eta babestu nahi izan du: "Badakigu horrelako proiektuek babesgabetasun sentsazio handia sortzen dutela herrietan, korporazio handiek mahai gainean jartzen dituzten baliabideen aurrean eta Administrazioak toki erakundeak zein lurraldea babesteko erakutsi duen interes faltaren aurrean". Hori dela eta, "laguntza eta elkartasuna" erakutsi diete kontzeju horiei, "haien erabakiak erakunde subirano gisa errespetatuak izan daitezen".

Era berean, Administrazio Publikoari eskatu diote "ez dezala alde batera utzi ingurunea jasaten ari den jazarpenaren eta espoliazio arriskuaren aurrean egin behar duen defentsa lana, eta egin dezala Arabako ingurune naturala eta laborantza lurrak pobretzen ez dituzten alternatiben alde".

 

 

 

Araba Bizirik plataformaren protesta ordezkari politikoen aurrean.

 

 

 

Itun sozial bat

"Proiektu horiek ez dituzte errespetatzen Eusko Jaurlaritzako Ingurumen, Lurralde Plangintza eta Etxebizitza Sailak 2019an onartutako Lurralde Antolamenduaren Gidalerroen printzipio gidariak, ezta baliabideen jasangarritasun eta ekonomia irizpideak ere, AHTa bikoizteko proiektuaren kasuan gertatzen den bezala", gaineratu dute plataformako bozeramaileek.

"Kontua ez da soilik Administrazioak berak onartu dituen irizpide arautzaileak aplikatzeko eskatzea, baizik eta azpiegitura edo energia berriztagarrien proiektuen garapenerako benetako itun sozial bat ezartzea, non ingurumenarekin gero eta sentsibilizatuago dagoen gizartearen beharrek eta haren benetako parte hartzeak lekua izango duen".


Kanal honetatik interesatuko zaizu: Azpiegitura handiak
2024-05-24 | Estitxu Eizagirre
Hernani, Arano eta Elduain arteko mugetan bost haize errota jarri nahi dituen proiektuaren atzean Endesa dago

Enigma Green Power enpresak "Ikatz Gane" deitu dion proiektu eolikoa egiteko "aldez aurreko administrazio-baimena" eskatu du. Bost haize errota jarri nahi ditu. Enigma Green Powerren jabe bakarra Arena Green Power da, eta honen kargudunen artean da Endesa.


Zubietako erraustegia martxan jarri zenetik, toxikoak asko handitu dira inguruko herrietan

Bost urtez aritu da laginak hartzen Toxicowatch erakundea erraustegiaren inguruko oiloen arrautzetan, goroldioan, zuhaitzetan, sedimenduetan eta ama esnean, besteak beste. 2019tik dioxina maila asko handitu da, baita metal astunak, PFASak eta beste gai oso kutsagarri batzuk ere... [+]


2024-05-24 | Gedar
2.000 sinadura bildu dituzte Pasaian Escalerillaseko bizilagunentzat bizitoki-alternatiba baten alde

Pasaiako Portuak eta Euskal Trenbide Sareak etxetik bota nahi dituzte hamabi familia. Ekainaren 1ean Trintxerpen mobilizatzera deitu du Oarsoaldeko Etxebizitza Sindikatu Sozialistak.


Statkraften zentral eolikoaren proiektuari helegitea jarri diote Azpeitia, Zestoa eta Errezilgo udalek

Babesturiko natur eremuetan egoteagatik, ingurumenean izan dezakeen inpaktuagatik eta hiri planeamenduarekin bat ez egiteagatik jarri dute alegazioa hiru udalek, besteak beste. Multinazional norvegiarrak eraiki nahi duen zentral eolikoak bost haize-errota handi aurreikusten ditu... [+]


Eguneraketa berriak daude