Baionako ikasle elbarrien laguntzaileek greba egitea erabaki dute, "lan baldintza txarrak" eta "soldata baxuak" dituztelako. Eskola-orduetan lan egiten dutenez, lanaldi partzialak egin behar izaten dituztela salatu dute: “Gainera, ez dugu ordainsaririk jasotzen prestaketa-denboragatik”. 900 euro inguruko soldata dute hilean, Frantziako pobrezia-mugaren azpitik.

FSU-Snuipp eta FO sindikatuek deitu dute greba Akademia Ikuskaritzak Baionan duen egoitzan. Berriak jaso ditu antolatzaileen hitzak: “Zaila zaigu greba egitea, lan baldintza oso txarrak ditugulako”.

"Ministerioari behin eta berriz eskatu diogu prekarietatetik ateratzeko eta etorkizun profesional hobea bermatzeko, eta premiazko neurri horiek ukatu dizkigute", adierazi du FSUk (Federazio Sindikal Bateratua). Egoera hobetze aldera, FSU-Snuipp sindikatuak Frantziako Hezkuntza Ministerioari eskatu dio laguntzaileei funtzionario estatusa emateko hiru urteren ondoren, kontratu mugagabeekin eta soldata igoerarekin. Halaber, lanbideen bateratzea etetea eta lanaldi osoko lanpostuak eskaintzea eskatzen dute. Sindikatuak adierazi du hemendik aurrerako xedea nahi dutenek denbora osoz lan egin ahal izatea dela.