Durangoko azokaren eredua denon artean adosteko proposatu du Joxean Muñozek, zer iritzi duzu horretaz?

Azokak dagoeneko badu bere eredua, eta hor dago. Beraiek esan beharko dute zein den eurek proposatzen duten eredua. Eta, denon artean hitz egin behar badugu, hitz egin dezagun Eusko Jaurlaritzak diruz laguntzen dituen gainerako ereduez ere. Hitz egin dezagun, zergatik bideratzen diren 3,8 milioi euro Guggenheimera, edo museoetara, edota orkestra sinfonikora.

Hori tranpa da. Kultur komunitatea biltzen duen Geuk plataformak egiten duen proposamenetako bat, foro bat eratzea da, non inor ez den kanpoan geratuko. EAJ berandu dator, eta ez du argi esaten zein den bere eredua. Pozgarria da, neurri batean, lortu dugulako, isilik egon direnak hitz egitea eta hori dela eta, uste dugu eztabaida askoz ere zabalagoa izan behar dela.

Sailburuordeak ere esan du izaera nazionala duen ekimena izanik, erakunde publiko guztien laguntza izan beharko lukeela.

Ados. Horretan arrazoia dauka, Euskal Herri osotik etorritako jendea biltzen da Durangon, izaera nazionala du eta erakunde guztien arteko ordainketa da logikoena, bakoitzak dituen baliabideen arabera. Baina hori azokaren aspaldiko eskaera da.

Sakonean, botere kontua dago. Erakunde publiko batzuk kultur arloan aitzindari eta dinamizatzaile izan behar direla uste dute, eta hori ez da horrela. Kulturgintzan beste parte bat dira, eta kitto. Egia da badauzkatela baliabide ekonomikoak, legalak eta juridikoak, oso inportanteak, baina beraiek ez dute besteek baino iritzi zilegitasun handiagorik. Eta hori onartuko balute, askoz ere harreman osasuntsuagoak izango genituzke. Onartuko balute, kulturgintzan ari garenok foro baten beharra dugula, guztion parte-hartzea. Hori falta da gaur egun.

Diru laguntzak emateko erabakia urrira arte atzeratzeak, nola eragingo dio Ahotseneari? Eutsiko diozue egungo ereduari?

Ahotsenea egin egingo da, musutruk bada ere! Oso erabaki kaltegarria da. Nola egongo liteke azoka, egin baino hilabete eta erdi lehenago, zenbat diru izango duen jakin gabe? Hori izugarrizko kaltea da, guztiz baldintzatzen gaitu. Ahotseneako lehen hiru urteetan musutruk aritu ginen, eta berriro ere egin daiteke, baina hori atzera egitea da. Erakunde publikoek derrigorrez lagundu behar dute azoka.

Ez gara dirutzaz ari, diru kopuru txikiez ari gara. Borondate politiko kontua da, besterik ez. Jaurlaritzak esan egin beharko du zeren alde egiten duen apustu. Proiektu asko dago azokak baino diru gehiago hartzen dutenak, eta azokak 50 urte beteko ditu aurten. Euskarazko kulturgintzaren hitzordu erreferentea da urte osoan, herritarrentzat batez ere.