Iruñeko San Jorge eta Buztintxuri auzoen arteko lurpeko pasabidean emakume bat bortxatzeagatik egotzitako gizona Foruzaingoak atxilotu du asteartean, eta kartzelan sartu dute Iruñeko 3. Instrukzio Epaitegiko magistratuaren aginduz, Noticias de Navarrak informatu duenez. 

Instrukzioko 5. Epaitegiko epaileak behin behineko askatasuna eman zion apirilaren 2an. Kautelazko neurri batzuk ezarri zizkion, hala nola biktimarengatik 500 metrora egoteko agindua eta epaitegian 15 egunean behin agertzeko betebeharra. Pasaportea kendu zion eta Espainiako Estatutik ateratzea debekatu zion.

Gasteizen hiru gizon atxilotu dituzte aste santuan 

Gasteizko Adurtza auzoan Udaltzaingoak 50 urteko gizon bat atxilotu zuen larunbatean, hainbat hilabetez genero indarkeria eta sexu eraso jarraituen delitua egotzita. Biktimak ageriko lesioak zituen, eta emakumeak udaltzainei jakinarazi die etengabe irainak eta eraso fisikoak zein sexualak jasaten dituela, Aleak jakitera eman duenez. Epaileak behin behineko espetxeratzea agindu du. 

Astelehenean 32 urteko gizon bat atxilotu zuten Gasteizko Arriaga-Lakua auzoko taberna batean emakume bati sexu erasoak egiteagatik. Aleak azaldu duenez, ustez establezimenduko terrazan zegoen emakumeari masailean musu eman eta bularra ukitu zion gizonezkoak. 

Ostegunean Udaltzaingoak 33 urteko beste gizonezko bat atxilotu zuen Gasteizko San Kristobal auzoan, bere bikotekidearen eta haren semearen aurkako eraso delitu baten ustezko egile gisa.