Kafeina eta taurina bezalako bizigarriek adin txikikoen arten eragin ditzaketen kalteak (kontzentratzeko zailtasuna, bihotz-frekuentzia handitu, arazo digestiboak, adikzioa...) zerrendatu ditu Galiziako Gobernuak. Alkoholdun edariekin alderatu ditu eta, horiekin gertatzen den moduan, produktu energetikoen kontsumoa debekatu egingo du. Halaber, edari energetikoen markek ezingo dute adin txikikoei zuzendutako publizitaterik egin.

Osasun Sailak emandako datuen arabera, 14 eta 18 urte arteko galiziarren %40,4k kontsumitu ohi ditu edari energetikoak, eta kopurua gorantz egiten ari da azken urteetan. Mutilen kasuan kopurua (%49,6) handiagoa da nesketan baino (%31,2). Compostelako Unibertsitateak egindako azterketaren arabera, bestalde, 12 eta 17 urteko gazteen %12,5ek astean gutxienez behin kontsumitzen ditu produktu energetikoak. Haietako askok, gainera, alkoholdun edariekin nahastuta, zeina "erloju-bonba" den.

Espainiako Estatuan, non edari energetikoen kontsumoa (%50) Galizian baino handiagoa den, gisako erabakia hartu duen lehenbiziko erkidegoa da hura. Aldiz, beste herrialde batzuetan (Letonian, Lituanian, Australian, Zeelanda Berrian edota Uzbekistanen) 18 urtez azpikoek debekaturik dute edari horiek kontsumitzea. Kolonbian, bestalde, 14 urtetik beherakoei aplikatzen zaie debekua.

Galizian onartuko duten lege berriak bapeatzaile edo zigarro elektronikoak ere barnean hartzen ditu, eta horiek kontsumitu eta saltzea debekatu egingo da, adin txikikoen kasuan betiere. Hain justu, zigarro horiez artikulua plazaratu zuen hilaren 11n Mikel Garcia kazetariak ARGIAn: Haurrei zuzendutako zigarro elektronikoek alerta gorria piztu dute.