Euskal Herriko Ikasleen Gurasoen Konfederazioak (EHIGE) antolatuta Eskola Publikoaren aldeko jaia ospatu dute igandean Mungian. 30 urte igaro dira lehenengo ediziotik, baita Euskal Eskola Publikoaren lehen legea onartu zenetik ere, eta Arkaitz Aburtoren, EHIGEko presidentearen, esanetan lege horren konpromisoak ezin dira amortizatutzat eman. Horregatik, “bultzada instituzional eta soziala” beharrezkoak direla azpimarratu zuen.

Ekitaldian esandakoaren arabera, Eskola Publikoa hornitzea agintarien esku dagoela uste du Aburtok, eta hezkuntza-komunitatearen eginbeharra, aldiz, baliabide horiekin eskola publiko euskaldun eta parte-hartzailea eraikitzea dela. Hortaz, Euskal Eskola Publikoa izeneko “altxorra zaintzea” guztion eginbeharra dela adierazi du. Jokin Bildarratz, Hezkuntza sailburua, ere bertan izan da, eta Eskola Publikoak egunero egiten duen lan bikaina azpimarratu du.

Jaiaren antolakuntzan parte hartu dute, EHIGErekin batera, Mungialdeko ikastetxe guztietako guraso eta zuzendaritza taldeek. Jaiaren aurkezpen prentsaurrekoan esan bezala, eskualdeko ikastetxe publikoen arteko harremana sendotzea zen xedea.

Hiru gunetan egon dira sakabanatuta jarduera guztiak: ikastetxe publikoak, Matxin plaza eta Torrebillela parkea. Lehena umeentzako gunea izan da, besteak beste, Pirritx, Porrotx eta Marimototsen emankizuna, grafiti tailerrak eta txalaparta tailerrak egin dituzte bertan. Bigarrena, umeentzako ez ezik helduenentzako espazioa ere bilakatu da, izan ere, Mungiako memoria historikoa ezagutzeko ibilbidea eraiki dute, bertsoek, euskal dantzak eta folk musikak girotuta. Hirugarrenean antzerkiak, jolas kooperatiboak eta puzgarriak egon dira.

Hezkuntza legea

Hezkuntza Legearen berriaren aurreproiektuaren aurka egiteko ere probestu du igandeko jaia Euskal Eskola Publikoaz Harro plataformak. Kalejira egin dute eguerdian, Euskal Eskola Publikoaren alde, hezkuntza lege honi ez lelopean. Bide batez, dei egin dute ekainaren 9an, ostiralean, Bilbon, Donostian eta Gasteizen antolatu dituzten manifestazioetan parte hartzera. Arratsaldeko 18:00etan abiatuko dira, Bilbon Plaza Eliptikotik, Donostian Bulebarretik eta Gasteizen Plaza berritik.