Aurtengo azoka egunetarako sei hilabete falta direnean, herri erakunde guztietatik zenbateko diru kopurua jasoko duten oraindik ez dakitela eta lanean segitzeko egoera hori jasanezina dela salatu dute Eusko Legebiltzarrean egindako agerraldian hitza hartu duten Nerea Mujikak eta Gotzon Barandiaranek (hurrenez hurren, Gerediaga Elkarteko presidentea eta Ahotseneko ordezkaria).

Merezi duen babesa

Iazko Azokaren aurrekontuaren %43 izan zen laguntza publikoa. Mujika eta Barandiaranen hitzetan ordea, euskal kulturgintzako ekitaldi nagusiena den aldetik, administrazioaren aldetik konpromiso finkoagoa merezi du ekimenak.

Ondorioz, 150.000 eurotako inbertsioa eskatu dute, orain artean baino 70.000 euro gehiago, modu honetan, datozen urteko azokek finantzazio publiko sendoagoa bermatua izan dezaten.

Antolatzaileek nabarmendu dute urtero 100.000 bisitari jasotzen dituztela, baita Azokak gizartean duen eragin sozial, kultural eta ekonomikoa ere. Euskal Herriko sortzaileen eta kultur industriaren egituratzaile izateaz gain, kanpoan ere euskal kulturgintzako erreferente nagusia dela azpimarratu dute agerraldian.