ARGIA.eus

2020ko abenduaren 01a

Dieselari zergarik ez igotzea eskatu du EAJk Espainiako aurrekontuak onartzearen truke

  • EAJk 85 zuzenketa jarri dizkio Espainiako Gobernuak aurkeztutako aurrekontuei eta dieselaren zergaren gaia jarri du erdigunean, PSOE-UP koalizio-gobernuak jeltzaleen babesa jasotzeko.

ARGIA @argia
2020ko azaroaren 18a
Aitor Esteban diputatu jeltzalea Espainiako kongresuan (argazkia: EAJ).

Proiektu ekonomikoak, azpiegiturak eta garraioak: horiek dira EAJk Pedro Sanchezen gobernuak aurkeztutako aurrekontuei egin dizkien zuzenketetan gehien nabarmentzen diren gaiak. Eta batez ere, kontu batek arduratzen ditu jeltzaleak, Noticias de Gipuzkoa egunkariak asteazken honetan argitaratu duenez: Espainiako Gobernuak dieselari zergak igotzeko asmoak.

Sabin Etxean ez dute nahi bereziki kutsagarria den erregai horri zerga gehigarririk jartzea eta puntu horren arabera eman diezaiokete baiezkoa ala abstentzioa aurrekontuei. EAJren ustez dieselari zerga handiagoa jartzeak “inpaktu ekonomiko negatiboa izango luke eta arriskuan jar litzake bi milioi lanpostu”.

Egiazki, Europar Batasuna aspaldidanik ari zaio Espainiako Estatuari eskatzen dieselaren eta gasolinaren zergak maila berean jar ditzala, izan ere, Batasuneko herrialdeen artean Espainiako Estatua da bi erregaien arteko zergetan alde nabarmenena daukana dieselaren alde eta karga fiskal apal horren erruz, baita Europar Batasuneko estatuen artean diesel litro bakoitzeko zorro publikorako diru gutxien biltzen duena ere.

Jeltzaleek azpiegituretan ere jarri dute fokua: besteak beste, Forondako aireportuarentzat 2,3 milioi euro eskatu dituzte eta Bilbo eta Pasaiako portuentzat 23 milioi. Energiaren alorrean ikerketa eta garapena sustatzeko neurri-sorta ere sartu du EAJk zuzenketen artean eta, lehenagotik ere egin izan dituzten eskaeren artean, Loiolako kuarteleko lurrak Donostiako Udalaren esku uztea ere eskatu dute.

PSOEk Unidas Podemosekin batera osatutako gobernuak kongresuko talde txikien premia gorria du aurrekontuak aurrera ateratzeko eta horregatik, EAJren zuzenketen ondoren, “negoziatzeko prest” agertu da.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Diesela  |  EAJ  |  Kutsadura  |  Espainiako Gobernua

Diesela kanaletik interesatuko zaizu...





Azkenak
EGILEA
Argia buletina
Egunaren laburpena
zure e-postan
Eguneraketa berriak daude