Asteazkenean, ezezagunek pinturaz eraso dute Ertzaintzak Arrasaten duen polizia-etxea, ARGIAri jakinarazi diotenez. Azaldu dutenez, ekintza horrekin "Euskal Herria eta bertako langileria jazartzen duten zipaioak zuzenki seinalatu ditugu".

Grebalari eta piketeen kontra oldartu, mugimendu sozialak eta herri eragileak "isunez ito", etxegabetzeak egin eta gazteak "kriminalizatzea" egozten diote Ertzaintzari, besteak beste: "Amaigabea izan daiteke ertzaintzaren bortizkeria eta bidegabekeria kasuen zerrenda", azaldu dute.

Hala, hedabide honi igorritako oharrean diotenez, sistema "kapitalista eta patriarkala betikotzea" da euren helburua, "horregatik jotzen dute militantzia politikoaren kontra". Gainera, Ertzaintzak Mosad Israelgo Inteligentziarekin duen "harreman estua" salatzeko ere baliatu dute ekintza hori: "Euskal Herria eta bertako langileria jazartzen duten berberak, palestinar herriaren kontrako genozidioa zuzentzen ari direnek entrenatzen dituztela azpimarratu nahi dugu".

Hori horrela, Palestinako herriarekiko elkartasuna adierazi dute: "Palestina aske izango bada, herri langileen arteko elkartasunagatik izango da –diote–, ez GKEek egindako ekintza humanitarioengatik".