Azken adibidea, joan den ostiralekoa: laguntza humanitarioa eskaintzeko Siziliara bidaia jakinarazi du Aita Marik, baina informazio gehiago eskatu diote Espainiako Merkataritza-Itsasketako agintariek, “bestelako helburu ezkutu bat” duela oinarri hartuta. Astelehenean eskaturiko informazio guztia bidali zutela eta oraindik ez dutela erantzunik jaso azaldu du Iñigo Mijangos Itsas Salbamendu Humanitarioa gobernuz kanpoko erakundeko lehendakariak. “Isiltasun administratibo horrek blokeatuta dauka Aita Mari. Aitzakiak dira, laguntza geldiarazi nahi dutelako”. Argi dute erabaki horren atzean Espainiako Gobernua dagoela.

“Aita Marik itsasoratzeko baldintza guztiak betetzen ditu eta ez dago inongo arrazoirik baimena ez emateko”, azpimarratu du Mijangosek.

Open Armsen itzal luzea

Open Arms itsasontziari porturatzeko baimenik ematen ez zitzaiola-eta uda honetan bizitako krisiak arrastoa utzi duela uste dute Aita Mariko kideek. “Pedro Sánchez lasaiago geratuko litzateke, Aita Mari Pasaian hondoratuko balitz”, adierazi du Iñigo Mijangosek.