Landare zaintzari buruz edozeinentzako erabilgarria den webgunerik ez dago euskaraz. Landareei buruzko euskarazko bilduma zabalena osatu nahi du bizi-baratzea.eus webguneak, guztion artean: "Dena dakienik ez da. Denon artean dena dakigu" lemapean egiten dio baratzezaleari webguneak parte-hartzeko deia: "Dakizuna eman eta behar duzuna hartu: hitz bat, izen bat, ohitura bat, trikimailu bat, argazki bat... Eta behar duzuna topatzen ez baduzu eskatu, galdetu. Badakienen bat izango duzu, urrutira gabe, laguntzeko prest".

Eremu hauei buruzko jakingaiak aurkituko ditugu webgunean: Baratzea, fruituak, basoa, lorategia eta etxe barrukoak dira landuko diren eremuak. Hauen barrua aztertuko dira barazkiak, ongarriak, gaitzak eta izurriteak, fruitu arbolak, txertaketa, inausketa, egurra eta zure, egutegia, lan orokorrak...

Jakoba Errekondoren artikulu eta aholkuak

Errekondok 30 urteotan egin dituen ARGIAko artikuluak eta Euskadi Irratiko audioak eskura jarriko ditu webguneak. Baita "Bizi Baratzea" liburuaren edukiak ere. Errekondok egun ARGIA astekarian idazten duen artikuluaz gain, webgunerako propio osatuko du beste artikulu bat, astero.

Baratzezaleek aukera izango dute galderak egiteko, eta Errekondoren erantzuna ziurtatuta dute. Horrez gain, gainerako erabiltzaileek ere aukera izango dute bere jakintza partekatzeko.

Baratzerako erremintak: ilargiaren egutegia eta eguraldia

Ilargiaren eguneroko gorabeherak eta honi lotutako lan garrantzitsuenak zeintzuk diren azalduko dira. Eta herrika eguraldiaren asteroko iragarpena eskainiko da.

Euskal Herriko agenda

Euskal Herri osoko ikuspegiarekin elikatuko den baratzearen inguruko agenda bakarra izango da. Bertan emango da azoka, hitzaldi, jardunaldi, ikastaro... garrantzitsuenen informazioa. Erabiltzaile denek izango dute ekitaldien berri emateko aukera.

Hiztegi bizi eta aberatsa

Euskarak izugarrizko aberastasuna du landareen mundua azaltzeko. Honi buruz jasota dagoen jakintza bildu, osatu eta zabalduko du webguneak.