Baratzeak badu umorerik: aurkeztu da 'Altza Porru' liburua

  • Garaiko produktuak dastatzeko aukera izan dute hilaren 16an Karabeleko ekonekazaritza etxalde esperimentalerako gunera gerturatu direnek. Jakoba Errekondok zortzi euskal marrazkilarirekin eta ARGIArekin elkarlanean argitaratu duten 'Altza Porru' liburuaren aurkezpenari hasiera emateko leku aproposa topatu dute, albahaka eta tomate landare artean, iritsi bezala gaian sartzen joateko. Bizi Baratzea proiektuaren barruan kokatzen da bigarren liburu hau, lurrari lotua dena irudi eta umoretik ezagutzeko aukera ematen duena.

     

     


2016ko ekainaren 17an - 12:59
Ezkerretik eskuinera: Jakoba Errekondo, Ainara Azpiazu “Axpi”, Joseba Larratxe, Asisko Urmeneta, Antton Olariaga, “Mattin” Martiarena eta Patxi Huarte "Zaldieroa". (Arg.: Dani Blanco)

Lan gogorra iruditu izan zait niri beti baratzekoa. Ederra ere bai, seguru asko, gehienbat uzta jasotzerakoan, baina lurrak nahi izanez gero ez du jai-egunik. Polita bai, izango da, baina lana. Edo hala neukan ulertuta nik.

Gurasoen etxe atarian badaukagu lur mutur bat, eta ziurrenik inguruko askok baino harreman gertukoagoa izan da nirea lurrarekiko; gutxienez ezagutu baititut sasoiko landareak hazten, eta tokatu baitzait udako egun beroen ostean ilunabarreko freskatua ematea tomate, piper eta letxugei edo abuztuko eguzki galgatan patata ateratzea, familiako plana bailitzan. Baina lasai nago, batek baino gehiagok esan baitit adinean gora egin ahala pizten dela baratzezaintzarako grina. Eta balkoiko letxuga batzuk jarri ditut badaezpada ere, grina esnatzen hasten zaidan-edo, probatze aldera.

'Altza Porru'ren aurkezpenak ere motibatu nau pixka bat. Maialen Lujanbiok hartu du hitza Urko Apaolaza ARGIAko kazetariak emandako azalpentxoaren ondoren, eta hitz egin digu liburuan idatzitako hitzaurreaz. Kalekumia. Nire burua sentitu ahal izan dut egoera horretan, baratzeko ezagutzen hastapenetan, hiztegi eta tresneria norberarentzat berri bat deskubrituz. Baina umorerik galdu gabe eta irri nano bat eginez ondotik begira pasatzen diren Tomate Urdinduen Kontseiluko zaharrei.

Idoia Torregaraik egin du Jakoba Errekondoren aurkezpena, herrikidea izanik askok baino hobeto ezagutzen baitu, bere terrenoan, egoera naturalean.

Jakobak berak eman dio liburuari errepasorik sakonena jendaurrean. Marrazkilariek egindako komikiak tartekatzen dituen testuak idatzi ditu Errekondok, ilargia, euskarazko esaerak, baratzearen diseinuak edo landareei eta lurrari lotutako irainak gaitzat hartuta.

Komikilariek hiru ariketa egin behar izan dituzte liburuan. Batetik gai librean ortuaren inguruko istorio bat sortu dute; bigarrenik Jakobak irratian jasotzen dituen galderak eta emandako erantzunak hartu eta bakoitzak galdera/erantzun bat irudikatu du; eta hirugarren ariketa bertsotako kartzelakoa bezala definitu dute, desafioka. Gai berdina jarri zaie mahai gainean zortziei, eta besteek gai bera landu behar zutenik jakin gabe egin dituzte marrazkiak. Ikustekoa da gai bera zein enfoke eta estilo desberdinetatik hartua den.

Karabelekon ere lanean jarri dituzte, aitzurrik hartu gabe baina margoak eskuan, Ainara Azpiazu “Axpi”, Joseba Larratxe, Antton Olariaga, Asisko Urmeneta, “Mattin” Martiarena eta Zaldieroa. Unai Iturriaga eta Unai Gaztelumendi falta izan dira baina egin dute azkar-azkar beren karikatura bana eta presente izan ditugu. Momentuan egin dituzte beren ilustrazioak eta azaldu digute zer egin duten 'Altza Porru'n.

Bertaratutakoek izan dute ondoren aperitifaz gozatzeko tartea, eta liburu berria besapean alde egin dute askok. Batzuk momentuan eman diote lehen errepasoa eta beste batzuk etxerainoko bidea aguantatu dute ireki gabe, eseritakoan plazerez gozatzeko.

Ni etxeko lanak erdi eginda azaldu naiz, liburuari gainetik behintzat errepasoa emanda, beldur bainintzen bestela ez nuela txisteen erdirik harrapatuko; baina orain bai, lasaiago helduko diot irriaren baratzeari, bete eta osasuntsu ezin baitaiteke izan irribarrerik gabe!


Kanal honetatik interesatuko zaizu: Bizi Baratzea
Opari ederra Bruselak transgeniko ekoizleei: bukatu dira orain arteko kontrolak

Agroindustriaren alde doan erabaki garrantzitsua hartu zuen Europako Batzordeak otsailaren 7an: NBT New Breeding Techniques teknikaren bidez genetika moldaturik duten haziak ez ditu transgeniko gisa sailkatuko. Hori horrela, transgenikoei orain arte egindako kontrol, segipen eta... [+]


Lapurdi eta Gipuzkoa arteko autobidearen blokeoa abiatu dute laborari asindikalek

A-8 autobideko ordainlekua 12:00etatik 16:00etara blokeatzeko helburua dute. Traktoreak iritsi dira Bidasoaren bi aldeetatik. Sindikatuen borrokari dagokionez, Arantza Tapia Eusko Jaurlaritzako Ekonomiaren Garapen, Jasangarritasun eta Ingurumen sailburuak hitzordu bat... [+]


Laborantza ereduaren auzia dugu laborarien ongiezaren oinarrian

Euskal Herria, Grezia, Herbehereak, Alemania, Espainiako eta Frantziako Estatuak, Italia... Europa mailakoa da laborarien azken aste hauetako protesta. Ongiezak eta kexuak akuilaturik, zabalduz doa mugimendua. Dela kostatu zaiona baino merkeago saldu beharra ekoizpena, dela... [+]


Eguneraketa berriak daude