Van Goghek obra bat baino gehiago saldu zuen bizirik zela

Nagore Irazustabarrena Uranga

2013ko urriaren 13an

Inprimatu

Deskargatu PDFa

'Mahasti gorria Arlesetik gertu' (1888) bizirik zela Van Goghek saldutako olio bakarra da, baina ez artelan bakarra, gutxienez beste hamalau obra saldu baitzituen hil baino lehen.Pushkin Museoa

Kazetaritza independenteak herritarren babesa du arnas

Egin ARGIAkoa

Vincent Van Goghek (1853-1890) artelan bakarra saldu zuen hil baino lehen. Mito ezaguna eta arrakastarik eza justifikatzeko aitzakia oso erabilia da, baina ez da guztiz zuzena.

Egia da Van Goghek olio bakarra saldu zuela bizi zen artean. Hil baino hilabete batzuk lehenago, Mahasti gorria Arlesetik gertu (1888) koadroa saldu zion Anna Blog izeneko margolari belgikarrari, 400 liberaren truke.

Saldutako koadro bakarra hura izan arren, dakigunez, gutxienez beste hamalau lanen ordainetan dirua jaso zuen margolari holandarrak. Zehazki, artzain protestante batek bi marrazki erosi zizkion 1879an eta, hiru urte geroago, 1882an, lumaz egindako hamabi marrazki egin eta kobratu zituen, enkargu bat medio.

Hala ere, nahiz eta mitoa egia ez izan, badu zentzua, arte enkanteetan preziorik altuenak lortzen dituzten obren egilea miseria gorrian bizi eta hil baitzen.