“Inora eramango nauen busa”... musika da? Zer eman dizu?

Musika, rocka, zure barrura iritsi eta hor bizi diren emozioak, sentimenduak, ikuspuntuak eta iritzi desberdinak adierazteko bidea da. Eta nahi nuke musikaren busean joanez bidaia bera topera bizi.

Zaila da zurearen moduko betiko rocka aurkitzea, lehengo soinua duena: Itoizen estiloko melodiak, hitz oso biluziak, bi ahotsen arteko jokoak, baladak...

Diskoko kantek oinarria 70eko eta 80ko hamarkadetan egiten zen musikan dute. Melodiak nagusi dira: pop ukitua, rhythm&blues, amerikana pixka bat eta brit-popa.

“Zer gehixeago izan behar dut gutxiago nahi badut izan”. Gutxiago gehiago da?

Bai noski. Sinplea eta hobea, sendoagoa! Baina esentziara iristeko, aurretik gauza asko egin behar dira.

Sendaezin gazteagoei musikaren gaitza kutsatu diezu? Nolakoa da beste belaunaldi batzuekin batera aritzea?

Nirekin elkartu aurretik kutsaturik zeuden. Gazte hauekin lan egitea oso aberasgarria da.

Tronpak oso efektu berezia eta aproposa gehitzen die rock kantei. Oso argi zenuen sartu nahi zenuela?

Lehenengo piano jotzailea aurkitu nuen eta geroxeago tronpa. Biek heziketa klasikoa dute eta hori beti da aberatsa, abestiek bestelako kolorea hartzen dutelako. Tronpak goxotasunaren dohaina du, beti zaio lagungarri melodiari.

Ahaztu nazazu behingoz. Bada Jotakieren garaitik faltan botatzen duzunik?

Jotakieren garaitik odol gaztearen falta botatzen dut, alegia 20 urte edukitzea.

Oso sinesgarri abesten duzu, oso hurbileko... Baduzu sekreturik?

Beno, ez naiz abeslari ona, ahotsa ere kaskarra dut, baina sinesten dut transmisioan eta abesten duzuna sentitzean.

Nik lo egin nahi dut. Borrokatzeaz nekatuta?

Lo egin nahi dut, bai, batzuetan nekatua sentitzen naiz baina oraindik borrokak jarraitu behar du. Borroka bera da bidaia eta momentu politak gure garaipen ttikiak.