Joan den astean azaldu zuten Gipuzkoako 34 udalerrik atez ateko hondakin bilketarekin hasteko asmoa dutela. Tartean dira Arrasate, Tolosa, Zarautz eta Bergara gisako herri handiak. Lehenik udal plenoetan hartuko dute erabakia. Legorretan jada onartu da, eta testu hau idazteko unean Villabona, Zizurkil, Segura, Lezo eta Zestoan onartzekoak ziren. Ekaina bitartean udaletako pleno guztietan eztabaidatu eta bozkatuko da. Bilduk agintzen du horietan gehiengo osoz, eta ez dute arazorik izango ekimena aurrera ateratzeko.

Ondoren sistema ezartzeko prozesua hasiko da, Debagoienan, esaterako, oso aurreraturik dute hondakinen kudeaketa plangintza, eta apirilerako bukatuta izatea espero dute. 34 udaletako aurreikuspenen arabera, 2013an herri guztietan egon behar luke atez ateko sistemak martxan.

Bilduk azaldu du parte hartzea izango dela ardatza eta herritarren ekarpenak jasoko dituztela. Helburu zehatza dauka ekimenak: hondakinen arazoari ahalik eta gehien gutxituz, berrerabiliz eta birziklatuz aterabidea ematea.