Errealitate bizia bildu nahi duen webgunea

  • Erreferente baten beharra zegoela ikusi zuen Koldo Otamendi musika zaleak. Horregatik sortu zuen duela hilabete gutxi Euskal Herriko rock agenda jasotzeko webgunea Asteko kontzertuen berri ematearekin batera ataria aberastu du argazki eta bideo galeriekin, baita zozketekin ere.

Inaxio Esnaola
2011ko martxoaren 13a
Musika Zuzenean
musikazuzenean.com

Askotan, gehiegitan, oso maiz erantzun bera errepikatzen dute musika taldeek elkarrizketetan: “Zuzeneko banda gara”. Hori horrela izanik, ez da harritzekoa Euskal Herriko musika eszenaren astez asteko kontzertu eskaintza beldurgarria izatea. Soziologoen egitekoen artean egongo ez bada ere, ondo legoke neurtzea gure lurraldea horren txikia izanda, zenbat kultur emanaldi dauden asteburu bakar batean. Esaterako, rock kontzertuen zerrenda luzea da. Gehiegizkoa ere bai, pentsatuko dute batzuek. Dena dela, errealitate baten aurrean gaude. Talde kopurua izugarria da, eta horietako asko zuzenera begira bizi dira. Eskaintza askotarikoa eta zabala da. Era guztietako eszenatokiak ere ez dira falta, inoiz baino gehiago dira eta. Hazi ez den gauza bakarra ikusle kopurua da. Orain, musika zale horiek kontzertu aukera asko dute eta bakarra hautatu behar.


Garai batean kalera, tabernara edo egunkarietara jotzen genuen kontzertuen berri izateko. Gaur egun ere joera antzekoa da, nahiz eta pixkanaka Internetek ordezkatu duen. Nolanahi ere, agenden informazioa arrunta izaten segitzen du, telegrama baten parekoa. Gabezia horretatik abiatuta jarri zuen martxan Koldo Otamendik Musika Zuzenean web ataria. “Euskal Herriko musika eszenaren hutsune batetik sortu zen. Konturatu ginen ez zegoela zuzeneko emanaldien berri ematen zuen inolako mediorik, erreferentzia bat falta zela”. Gunea aitzindaria da hizkuntzari eta edukiari dagokionez. Otamendiren hitzetan, “bai hemen eta bai atzerrian ere, ez dugu gurea bezalako webgunerik topatu”. Izan ere, agendari garrantzia berezia eman diote, beste euskarazko musika hedabideek ez bezala. “Gurean, oso gauza interesgarriak topa daitezke sarean barna, baina agian gehiago zentratzen dira musikaren beste arlo batzuetan: elkarrizketetan, monografikoetan, diskoen aipamenetan…”.


Musika Zuzenean atariaren ardatza kontzertu agenda da. Euskal Herriko “zuzeneko eszena bere osotasunean” hartzea da ideia. Musikalki, ordea, ez dago baldintza edo mugarik. “Nagusiki rock musika lantzen dutenak barneratzen ditugu, zentzu zabalenean”, azpimarratu du Otamendik. Kontzertuak herriz herri daude sailkatuta eta asteburuari begira bost edo sei nabarmentzen dituzte. “Ez dago irizpide jakin bat. Agendan diren emanaldiak bildu eta nabarmentzen joaten gara, beti ere oreka mantenduz, herrialde, areto edota musika taldeen artean, garrantzia eman gabe zenbat ikusle batuko diren”. Agenda osatu edo elikatzeko modu diferenteak dituzte, ataria “gune ireki bat bezala irudikatzen” dutelako. Otamendik argi du egitasmoa aurrera ateratzeko “musika taldeek, musikazaleek, aretoek, gaztetxeek edo eragileek parte hartzea” ezinbestekoa dela. Eta horretarako, nahi duenak bere emanaldien berri emateko aukera dauka.
Informazioarekin batera, ikusgarritasuna ere landu dute, zuzenekoen argazki galeria sortuz. Txukuna, praktikoa eta deigarria. “Ataria prestatzen ari ginela, konturatu ginen argazkilari mordoa zegoela gure artean”, gogoratu du Otamendik. Horrela, irudien bitartez igarotako emanaldien berri ematea erabaki zuten, “bertan bizitakoa berriz bizitzeko edo bertan egon ez zenak gertatu zena jakiteko”. Pixkanaka argazkilari sare polita osatu dute, eta ondorioz, era guztietako argazkiak topa daitezke. Bideo atala ere zuzeneko emanaldiei buruzkoa izatea nahi zuten, baina zailtasun asko izan dute soinu eta irudi onak dituzten bideoak aurkitzeko. Horrela, taldeek argitaratzen dituzten bideoklipak eta zuzeneko batzuk ikus daitezke. Aipaturiko bi atalekin lotuta, kontzertu kroniken atala ere sortu dute. “Gehiago jasotzea gustatuko litzaiguke” dio Otamendik, baina gustura dago orain arte argitaratu dituztenekin. “Argazkien atalarekin bezala, interesgarria deritzogu igarotako emanaldietan bizitakoa ezagutaraztea”.


Zuzeneko emanaldien aurretikoa eta ondorengoa atalka sailkatzeaz gain, pizgarririk ere ez zaio falta Musika Zuzenean atariari. Bisitariekin harremana estutzeko eta zerbait gehiago eskaintzeko zozketa gunea zabaldu zuten. “Amu gisa sortu genuen, eta jendearen erantzuna oso ona izan da”. Webgunean erabiltzaile profila sortzen dutenen artean, bertako taldeen diskoak, kontzertu sarrerak eta beste zozketatzen dituzte. Horrek harreman zuzena du atariaren harpidetza eskaintzarekin. Horrela azaldu digu Otamendik: “Bi harpidetza mota daude. Erabiltzaile profila sortzen duenak atal ezberdinetara sarbidea izango du: iruzkinak idatzi, kontzertuen berri eman... Aldiz, egitasmoa diruz lagundu nahi duena Musika Zuzen Lagun egin daiteke 25 euro ordainduta. Trukean kamiseta bat eta sariak eskuratzeko lehentasuna izango du”.


Hasiberria den egitasmoak harrera ona izan du musika talde eta zaleen artean. Aurrenekoek badute azkenik sarean txoko bat beraien emanaldien berri nahi beste emateko, eta bigarrenek, agenda osatuena bertan topatu dezakete. Otamendi oso pozik dago orain arte emandako urratsekin, baina asmo berriak dituztela aurreratu digu. “Atal berriak prestatzen ari gara, eta ekimen ezberdinak martxan jarri behar ditugu epe laburrean”. Hain zuzen ere, web ataria Musika Zuzenean egitasmoaren hasiera baino ez da. Aurrerantzean asmo eta helburu zehatzak dituzte: “Zuzenean egiten diren emanaldiak bultzatu eta sostengatu nahi ditugu. Euskal Herriko musika eszena aberatsa erakutsi eta musika zuzenean bizitzeko gonbita egin. Bide horretan, argazki erakusketa bat prestatzen gabiltza, eta zenbait mahai-inguru ere martxan jartzekoak gara”. Musika eszenaren errealitate bizia mantentzeko nahitaezkoak dira horrelako egitasmoak. Taldeek ederki betetzen dute beraien rola, eta ikusleena da hitza.
 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak
2018-09-30 | Adur Larrea
Ez hanka ez buru
Gernikako Estatua 2.0

2018-09-30 | Mikel Asurmendi
Daniel Olzomendi, Euskal Elkargoko kontseilaria
"Ez etorri bigarren etxe bat erostera, partekatu bizitza gurekin erosi gabe"

Izura-Azme, 1974; Oztibarre, Baxenabarre. Herri horretako auzapeza da. Euskal Elkargoko Turismo, Natura eta Ondarearen kontseilaria. Biologia eta geologia irakaslea Baionan: “Politikan aritzea ez da aise, ez bazara politikari profesionala bilakatzen bederen. Nik nahiago dut ene lanpostua atxiki, orduak tipituz, eta independente izan ene pentsatzeko eta egiteko moldetan”, erran digu. Hartara, 2020an bere karguen aldia bukatzen bazaio, irakaskuntzara itzuliko da denbora osoz, gustura... [+]


2018-09-30
Elkar topatzea

“Esan izan da hantustea dela musika klasikoa. Nork imagina zezakeen zintzarriak, txalaparta, txirula edota ttun-ttuna entzutea Vivaldiren partitura batean... Beharbada ustez urrun dagoena, benetan hurbil dago. Ea egotea den elkar entzun eta ulertzeko gakoa! 4 sasuak ia ia sedukzio jolas bat da. Bertan, hizkuntza arrotzak maitatu eta musika-tresna oso ezberdinak erakarri egiten dira”.


Mugikorra eskolan, zertarako?

Ez naiz ni debeku zalea, baina entzun diet ikastolen elkarteko eta eskola publikoko hainbat ordezkariri mugikorrak eskolan debekatu ordez haurrei sakelakoa egoki erabiltzen erakutsi behar zaiela, pedagogikoki tresna bikaina dela eta ikastetxe bakoitzak erabaki beharreko zerbait dela, eta galdera ugari geratu zaizkit airean.


2018-09-30 | Z. Oleaga
Mamadou Oury Diallo
"Nire bizitza beste askorena da"

Mamadou Ouryren bizitza oztopo lazgarrien kate baten eta horiek gainditzearen lekukotasuna da. Jaiotzetiko pobrezia Ginea Konakryn, Europara bidaia pateran, Almeriako plastikozko itsasoa, Arabako adingabeen zentroetako tratu txarrak eta kanporatze saiakera ilegalak, bizileku-baimena lortzeko ezin konta traba. Lekukotasun hau milioika pertsonaren historia konpartitua da. Atzo bezala, gaur ere bai.


Hamar urte krisian
Kasino globalaren pitzadurak hor jarraitzen du

2008ko irailaren 15ean Lehman Brothersek kiebra onartu zuenean paradigma eta uste asko ere hondoratu ziren berarekin. Atzeraldi Handia-ren hasiera izan zen, nahiz eta finantza kapitalismoa aspaldi zebilen sistema irrazional baten mamua begiztatzen etxe-orratz distiratsuetan islatuta. Agintariek, egoera bideratu beharrean okertu egin dute: jendea ari da krisia pagatzen eta bankuek jarraitzen dute erruleta arriskutsuaren jokoan.


Martin Orbe. Abadea ere torturatua
"Ezin zara torturaren zamapean egon bizi guztian"

Martin Orbek bazuen lagun bat, Eusebio Martija, inoiz hari zelan zegoen galdetu eta “Ederto, xehetasunetan sartu gabe”, Martini erantzun ohi ziona. Xehetasunetan sartu gabe Martin Orberen bizia ere: hierarkiatik aparteko apaiza, irakaslea, torturatua, Zamorako kartzelan egona, Gogor taldekoa, UEUren gidari… Xehetasunetan sartzera egin dugu, Orberen lagun Martija hark ez bezala. Nola esango nizuke, bada?


2018-09-30
Martin Orbe Monasterio (Errigoiti, 1934)

Abade Zeanurikoa, hogei urtez. Gogor taldekoa. Espainiako konkordatu kartzelan preso eduki zuten 1969tik 1972ra Zamoran. Gordin kontatuak ditu torturak Zamorako apaiz-kartzela (Txalaparta, 2011) eta Apaizak ere torturatuak (Intxorta 1937, 2017) liburuetan. Espetxetik irten eta, berriz atxilo hartu baino lehen, Ipar Euskal Herrira ihes egin zuen. Udako Euskal Unibertsitatea gidatu zuen 1976tik 1983ra. UEUren Merezimendu saria jaso zuen 2012an. Euskaltzain ohorezko ere bada. Abade irauten du.


ASTEKARIA
Azkenak
EGILEA
Eguneraketa berriak daude