Alvaro Rabelli literatur ikerlariak Berrian: "Genero txikitzat eta eleberriaren mendekotzat hartu izan da ipuina, baina literatur genero autonomoa da, hibridaziorako joera duena eta irakurlearen inplikazioa suposatzen duena. Hori oso garrantzitsua da. (...) Ipuinak gorabehera handiak izan ditu batez ere 90eko hamarkadan, argitaletxeek eleberriaren alde egin baitzuten nabarmen (...) Akademikoki ipuinak ospea du, baina hedabideetan ez dira aipatzen".

Josetxo Azkona idazleak Diario de Noticias egunkarian, Arbola naiz, eta zuhaitza (Alberdania) liburuaz galdetuta: "Idazten dudan bakoitzean belarriak markatzen dit bidea, musikaltasuna bilatzen dut, hitz jokoak, esaldi kateak; izan ere, testu bat idazteko ezinbestekoa da erritmoa kontrolatzea: zenbait momentutan erritmoa azkartu behar da, beste batzuetan, berriz, moteldu. Beraz, jende aurrean edo irratian irakurri behar baduzu, poema interpretatu behar da, ezin da irakurketa neutro bat egin".