Josu Zabala Hertzainak taldeko kideak Deian, duela 25 urte plazaratu zuten lehenengo diskoaz: "Dakidana da Gasteizen izan zuen harrera. Han ikaragarria izan zen. Kolpe itzela. Nire ustez Gasteiz zen garai hartako kultur hiriburu, erreferentzia bat, eta laster batean zabaldu zen. Oso kontu berezia da euskal rocka euskaraz oso gutxi mintzatzen zen lekuetan agertu izana. Azkoitin Jotakie zegoen eta eurek arrakasta gutxiago izan zuten, esaterako. Mantsoago zabaldu zen euskaraz eginiko rocka leku euskaldunetan; besteetan masiboa izan zen".

Manex Pagola idazle eta kantariak Euskonews & Media agerkari elektronikoan: "Aktualitatea segitzen dut. Kantaldiak, bertsu saioak, antzerkiak... Horiek denak ikusten ditudalarik, iruditzen zait irauten dutela harrigarriki. Bada eskaintza zabal bat, gehienetan kalitate handikoa, edozein sailetan. Oso pozik nago potentzial handi bat ikusten baitut. Eskaintza guzi hori proposatzeko lan anitz egin behar da. Eta harritua naizela diot ditugun baliabideak ez baitira batere handiak. Nire iritziz kulturgintzan egiazko baliabideak beharrezkoak dira euskal kulturak iraun dezan. Ikusiz diren medio guztiekin dagoen ondorio ederra, behar diren medioak izanez geroz, emaitza oraino eta aberatsagoa izanen zen".