ARGIA.eus

2020ko ekainaren 02a

Estepako otsoaren rock heldua

  • Los Ajustadores ::El templo del rock

    ES3

    iraupena ::49’09’’

    prezioa ::15€

Iker Barandiaran @IkerBarandiara
2008ko irailaren 28a
Gasteizko Alex Ferreirak zainetan darama rocka. Los Padrinos talde izerditsuaren gidari izan zenak gerora Euskal Herriko ehunka taberna eta zulo bisitatu ditu El Hierro izenpean, gitarra alboan zeukala: berak sortutako kantuak, Dylanenak, Stonesenak eta beste hainbatenak sentimendu handiarekin eskainiz. Azken aldian, baina, burdinari ondo eusteko bidaide aproposak aurkitu eta Los Ajustadores osatu du. Hitzek hausnarketa kutsua daukate, kanpoan gauez eta errepidean ibili den estepako otsoak itzuleran idatzitakoak, alajaina. Era berean, rocka egiten jarraitzen badu ere (zer, bestela?) azeleragailua gutxiago sakatu eta M-Clanen tamainako sustraidun rocka aukeratu du, tarteka AEBetako hegoaldearen usaina duena eta gitarra eta hammond doinu ederrez borobildutakoa. GP diskoetxearen azpi-zigilu batek kaleratu du.
Alex “El Hierro” - Los ajustadores
«Kantuetako batzuk baladak direla uste duenak etxean marihuana erreta eta burua joaten utzita entzun ditzala»

Non kokatuko zenuke “Rockaren gotorlekua”? Gustura gelditu zara emaitzarekin?


Rockaren gotorlekua bakoitzaren zilborraren erdian kokatuko nuke. Niretzat gotorlekuak ate bat irudikatzen du, ukiezina eta uki daitekeena batzen dituen atea. Leku horretatik gero eta hurbilago nago. Gustura nago emaitzarekin, baina beti dago zer hobetu.

“Astea kargatutako errebolberra da eta astelehenak ondo-ondotik botatako tiroak”. Esaldi polita. Zer arma beharko genuke astearen bukaeran bizirik irauteko?


Arnasa ondo hartu, gehiegi ez pentsatu, ahal den beste sentitu, gauzak serioegi ez hartu eta ahalik eta barre gehien egin.

Asko kosta zaizu “gauerdiko trena” hartzea eta “zure leihoko distira” berreskuratzea? Los Padrinosen autotik jaitsi eta beste errepide lasaiago bat hartzea?


Tren hori askotan hartzen dut, nahiz eta batzuetan alde egiten uzten diodan. Garrantzitsuena da arretaz ibiltzea eta behar denean trena hartzea.

Jakin-mina daukat: aitarekin zorretan zaude rocka zainetan daramazulako?


Nire aitak nahi zuen ni edozer gauza izatea rock musikaria izan ezik, baina naizena beragandik dator; ezin nintzen beste ezer izan. Bai, neurri handi batean, berari zor diot.

Zer da “Rockaren zirkua”-k daukan onena eta txarrena?


Onena igoera da eta txarrena badakizu…

“Nire inguruan jende asko behar dut, baina ezin diet egunero-egunero guztiei aurre egin”.


Bai. Sortzaileak bakardadea behar du, baina aldi berean gizakiak besteekin egon behar du, nahiz eta askotan kalte egin.

Norbaitek zure kantuetako batzuk baladak direla esango balizu zer erantzungo zenioke?


Nire abesti geldoenak ez dira baladak. Baina hala pentsatuko balu gomendatzen diot etxean lasai entzun ditzala, marihuana erre dezala eta utz diezaiola joaten bere buruari.

Zer daukate Calamarok eta Sabinak beste askok ez dutena?


Argentina eta hango rock aitzindaria, ahots alprojena, eta inguruko hitz onenak.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

ASTEKARIA
2008ko irailaren 28a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude