Mikelazulo Kultur Elkarteak eta Banda Bat taldeak antolatuta, ‘Lupa’ dokumentalen mostra egingo da hilaren 30etik maiatzaren 4ra bitartean Donostian eta Errenterian (Gipuzkoa). Sortzaile, ekoizle eta banatzaileen elkargune izan nahi duen ekimen horretan Euskal Herriko zein atzerriko autoreek parte hartuko dute. Dokumentalaren alderdi diferenteak jorratuko dituzten mahai-inguruak eta proiekzioak izango dira jardunaldien ardatz. Gaviotas blindadas 3 filmaren proiekzioak irekiko du egitaraua hilaren 30ean, Donostiako Kutxa aretoan; eta Angor filmak itxiko du maiatzaren 4an, Mikelazulon (Errenteria).