Ekologismoaren garaipen erabatekoaren seinaletzat har liteke 007 ospetsuaren autoarena, baina baita ideologia horren erabateko porrotaren seinaletzat ere, nondik begiratzen zaion.

Gizarte modu jakin baten aurkako mugimendua izan zen hasieran ekologismoa. Gaur egun, gizarte modu horretan erosoen kokatuta daudenek ere ekologistatzat aurkezten dute beren burua.

Izan ere, gizarte modu jakin horrek, kontsumismoarenak, horixe du berezko ezaugarri behinen: direnak eta ez direnak irentsi, beretu eta neutralizatzeko gaitasun harrigarria; eta nago ez ote duen horixe egin ekologismoarekin ere.

Auto ekologikoan ibiliko zaigu hurrengoan Bond, eta baliteke 007 agentea 0,7 agentea bihurtzea ere, hirugarren munduarekiko elkartasunez noski. Bitartean, ordea, emakumeak bildumatzen jarraituko du, auto ekologikoak jazarpen zoroetan suntsitzen, gaiztoak dotorezia finez hiltzen.

Izugarri hedatu da, bai, ekologismoa, baina hedatuz joan den heinean nabarmen egin du berdetik zurira.