Garaigoikoa izeneko blogean (www.blogak.com/garaigoikoa) irakurri dugu nola hasi den Pere Mayans soziolinguista katalana soziolinguistika lantzeko filmen zerrenda egiten bere blogean. Hiru film paratu ditu oraingoz, dagokien fitxa tekniko, laburpen, iruzkin, bereziki landu beharreko eszena eta bibliografiekin. Ikasleekin zein helduekin aritzeko moduko materiala dela dio Mayansek. Honakoak dira gomendatutako hiru filmak:

- Windtalkers. John Woo-ren filmak AEBetako nabajoen herriarekiko diskriminazioa agertzen du.

- Rabbit Proof-fence (Belaunaldi galdua). Australian bertako hizkuntzek eta kulturek jasandako jazarpenari buruzkoa da Philip Noyce-ren filma.

- The wind that shakes the barley (Garagarra astintzen duen haizea). Irlandan kokatutako Ken Loachen film honetan gaelikoaren aurkako errepresioa ageri da.

Garaigoikoa blogean erabiltzaile anonimoak beste bi proposamen egin ditu: My Name Is Yu Ming eta Fluent Dysphasia, biak Daniel O’Hara zuzendariarenak eta Irlandako gaelikoari buruzkoak.