Etsipenaren zergatiak. Gure etsipenaren arrazoietako bat ziurrenik gehiegi amets egitea izan da. Gauzak guk nahi bezain azkar, eta guk nahi bezalako norabidean aldatuko zirela, pentsatzea. Ilustrazio garaiko pentsalari ezagun batek aspaldi esan zuen: “Gizakiak zenbait egoeratan bere erakunde publikoak bat-batean alda ditzake. Hala ere, legeen aldaketa eta biziera eta pentsaera aldaketak astiro eta pausoka egiten dira”. Ikuspegi oker honek ezkortasuna eragin du askorengan eta gazteenengan bereziki. Horrela ba, “ez dago zer eginik, alferrik da” esateko ez da asko behar.

- Polarizatutako aniztasuna duen euskal gizartean bizi gara. Gure artean diharduten indar politikoen arteko erradikalismoa, gogortasuna eta ezin eramana ulertzea ez da erraza. Erakundeetan prepotentzia izateak edota hauen aurka sistematikoki aritzeak ezin diezaiokete herri honi gizarte aurrerakoi eta moderno izateko beharrezkoak dituen erabakiak hartzea galerazi. Horrelako posizioek isolamendura eta gorrotora bestetara ez garamatzate.

- Gure kasuan badago esan beharreko beste arrazoi bat: ETAren borroka armatuak bizitza politikoan duen eragina. Ondorioetako bat, zalantzazko legezkotasuna duen Alderdien Legea, hainbat hiritar euskaldun, ordezkotza politikorik gabe uzten duena. Lege antidemokratikoa. Hala ere, asko gara egoera triste eta ez-bidezko hau, dagokien taldeek beste era bateko postura eta jitea azaldu balute, konpon zitekeela pentsaten dugunak. Adostasunak zailtzen dituzten oztopoak ez kentzeak ez du elkarbizitza eta gatazka politikoa gainditzen laguntzen.

Itxaropenerako arrazoiak. Ba al dago itxaropenerako arrazoirik? Oskar Wildek esan zuen “utopiarako lekurik ez duen maparik ez genukeela kontuan hartu behar”. Arrazoia galanta eta guretzat ere baliozkoa.

- Gure gizarte-harremanak eraberritu eta bultzatzea. Gure herria nekatuta dago tirabira politikoak medio eta giza-harreman horiek berbideratzea eskatzen ari da.

- Solidaritza zeinuak lantzea. Herri askotan egiten dena jadanik eta oraindik ere gehiago egin daitekeena irudimen eta ausardia pixka batekin.

- Ildo honetan lortuko dugu hauteskundeetan partaidetza. Kritika politikoa benetako demokraziaren oinarrizko ezaugarria da, baina kritikakeriek eta etengabeko deskalifikazioek desprestigio giroa eta gazteengan konpromiso politikotik ihes egin nahia sortzen dute.