Neska-mutilei pertsona guztiak errespetatzea eta indarkeriarik gabe bizikide izaten irakastea da hezkuntzaren oinarrizko helburuetako bat. Helburu hori lortzeko bidean Arartekoak, Kataluniako Sindic de Greuges erakundearekin batera, eskolako bizikidetzaren eta indarkeriaren gaia aztertzea erabaki zuen. Ikerketaren xedea, besteak beste, honakoa zen: ea ikastetxe eremuko jokabide gatazkatsuak benetan gorakada izan duten, edota gai honekiko dagoen gizarte kezkak beste arrazoirik duen. Horretarako, 2005-2006 ikasturtean Euskal Autonomia Erkidegoko Bigarren Hezkuntzako 80 ikastetxetan ikerketa egin zuen. Azterlan haren ondorioak eta Arartekoari iradoki zizkioten gomendioak dira orain plazaratzen direnak.