ARGIA.eus

2020ko ekainaren 01a

El Columpio Asesino: «Ez dugu inolako estilorik jarraitzen. Abesti bakoitza patroi batekoa da»

Iker Barandiaran @IkerBarandiara
2006ko urriaren 15a
Disko hau rockeroagoa da eta ez hain elektronikoa.
Ez ginen horren bila joan, baina gogorragoa da eta atmosfera gutxiago ditu. Baliteke rockeroagoa izatea, nahiz eta guk egiten dugunari pop deitu.

Ahotsak eta hitzek garrantzia handiagoa dute...
Aurreko diskoko hitzak ez ziren egokiak eta kendu egin genituen. Halabeharrez hasi nintzen abesten, baina ez naiz abeslaria. Hala ere, dagoeneko nire ahotsera ohitu egin gara.

Zelakoak dira zuen zuzenekoak? Asko zaintzen duzue irudia, argazkietan bezala?
Argazkiak egiterakoan diskoan dagoena irudikatzen saiatu ginen, hau da, martzianada bat. Abesti lasairik gabe, kontzertuak energia eta erritmo handikoak izaten dira.

Asko irakurtzen duzue?
Ez. Evaristok kanpotar askok baino gehiago inspiratu gaitu. Guk punka bete-betean bizi izan genuen, eta Evaristok freskotasun eta harrotasun berezia dauka. Allen Ginsberg ere gustuko dugu.

Zinemarako moduko kantuak egiten dituzue.
Behin baino gehiagotan esan digute hori. Kantu lasaienak hainbat film laburretan erabili dituzte.

Txerrien koipea behin baino gehiagotan aipatzen duzue hitzetan.
Bai, langileen burgestea irudikatzen du. Mendebaldeko koipea. Ezer egin gabe sofan botata egotea.

Hainbat presondegitan kontzertuak eman zenituzten.
Hasieran lotsatuta geunden, baina oso esperientzia ona izan zen. Sei kartzelatan izan ginen. Presondegietako dramak barru-barrutik ezagutzen dituzu, baina esker oso oneko ikusleak dira. Alcala-Mecon emakumezkoen moduluan jo genuen.

Nafarroan oso satelite sentitzen al zarete? Bada inguruan gustuko talderik?
Orokorrean nahiko satelite sentitzen gara edozein lekutan. Oso talde berezia garela esaten digute. Ez dugu aurreiritzirik, eta ez dugu inolako estilorik jarraitzen. Abesti bakoitza patroi batekoa da, halakoak gara gu ere. Jon Ulezia y Cantina Bizarra taldea oso gustuko dugu.
----------------------------------------------------------------------

De mi sangre a tus cuchillas
El Columpio Asesino
Astro
Iraupena: 49'26'' 13,80 euro


Barruko mamuak airatzeko eskaintza klasifikagaitza

Izen iradokitzailea duen Iruñeko talde hau ezezagun samarra da gure artean. Oso ezezaguna, Espainiako lehiaketa eta jaialdi espezializatuetan jaso duen harrera itzela kontuan hartuta. Emaitza klasifikagaitza da, eta bigarren diskoan gogortu diren arren, tarteka zinemarako giro aproposak irudikatzen dituzte. Ohiko instrumentuez gain, sintetizadoreak, haizezko instrumentuak, elektronika edo parean jartzen zaiena baliatzen dute. Musika estiloetatik salto egiten dute axolagabeki koktel ontzi aberatsa (rocka, flamenkoa, surfa, elektronika dantzagarria, spaghetti-westerna, popa...) eskainiz. Adibidez, umeendako aproposa den nana batetik ahotsa eta arima urratu ditzakeen pasarte batera jauzi egiten dute. Hitzen bitartez, Jorodovskyren parera, barruko mamuak airatu eta entzuleekin konpartitzen dituzte.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

ASTEKARIA
2006ko urriaren 15a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude