Pasa den ekainean Hazparneko herriko etxeak Eihartzea kultur etxea itxi zuen, eraikina egoera txarrean zegoela argudiatuta. Bertan biltzen ziren taldeak kalean geratu ziren eta horietako askok ez dute beste bilgunerik erdietsi oraino. Eihartzea elkarteak Hatzen Bidea erakustoki ohian -diru arazoengatik itxi zuten iaz zentro arkeologikoa- du egoitza orain. Hori adostu du herriko etxearekin, baina egoitza behin-behinekoa da. Dagoeneko martxan da elkartea eta laborantza jardunaldiak eta hainbat kontzertu atondu ditu udazkenerako. Emazteak Diote taldea, berriz, egoitza bila ari da, baina ez du alokairua ordaintzeko dirurik. AEK-k arazoak ditu. 12 metroko bulegoa alokairuaren truke utzi dio herriko etxeak, baina ez du eskolak emateko lekurik. Radiokultura irratia, bestalde, Lekuinera aldatu da, Lagunarte taldearen egoitzara.

Irailaren 12tik 15era, Gasteizko Antzinako XXV. Musika Asteak zaletu ugari bilduko ditu San Pedro elizan 20:00etatik aurrera. Aurtengoan honako talde eta abeslarien kontzertuak ikusi ahal izango dira: Al Ayre Español eta Carlos Mena, Camerata Iberia eta Marta Almajarano, Xavi Díaz eta Pedro Estevan, eta Florilegium. Lapurdin, aldiz, Mozarten eta bere garaikideen (Haydn, Arriaga...) musikaz gozatzeko aukera izango da. Mozarten jaiotzaren 250. urteurrenean, bere musika ezezagunena zabalduko du Euskal Herriko Kostaldeko Musika Jaialdiak. Hilaren 12a arte, Pragako Filarmonikaren, Bordeleko Akitaniako Orkestraren eta Baionako eta Lapurdiko Itsasaldeko Orkestraren kontzertuak izango dira Lapurdiko zenbait herritan.

Euskal Herriko Trikitixa Elkarteak Jazinto Rivas Sanz Elgeta (Donostia, 1906-1964) izango du ardatz aurtengo Inpernuko poza Trikitiaren IV. Jardunaldietan, irailaren 6tik 8ra arte. Iker Goenaga soinujoleak Elgetaren hitz eta doinuez hitz egingo du, haren hainbat pieza tartekatuaz. Koldo Izagirrek Soinuaren lekuak: Elgetatik nora? hitzaldia eskainiko du. Azkenik, Patxi Santamaria eta Inazio Tolosak Elgeta ehun urte ikuskizuna antzeztuko dute, Laja eta Landakandaren laguntzaz.

Irudiari lotuta dagoen hiria da Biarritz. Horren adibide dira Latinoamerikako Zinemaren Jaialdia, FIPA eta Argazki eta Bideo Topaketa. Biarritz garatzen ari den Plateau Image (Irudiaren Platoa) egitasmoaren barruan, goi mailako ikasketak sortzea erabaki dute BAB (Baiona, Angelu eta Biarritz) hiri elkargoak eta Frantziako Kultura Ministerioak. Hiru eta bost urte bitarteko ikasketak izango dira eta arte plastikoak eta multimedia landuko dira. Programa pedagogikoa Frantziako Gobernuak ezarriko du eta Pascal Convertek garatuko.