Lasterketa Herrikoien Euskal Herriko Zirkuitua


2021eko uztailaren 16an

Lehen aldiz Euskaldunon Egunkariak antolatu zuen Euskal Herriko Lasterketa Herrikoien Txapelketa. 2000tik 2002ra hiru aldiz antolatu zuen Euskal Herriko bost hiriburu -Donostia, Baiona, Bilbo, Gasteiz eta Iruñea- lotzen zituen lasterketa zirkuitua. Aurten, beste ekimen batek hartu dio lekukoa: Euskal Herriko Herri Lasterketen Zirkuituak. Urtarrilaren 22an Betelun (Nafarroa) jarri zen martxan, eta heldu den azaroaren 4an amaituko da, Orion (Gipuzkoa). Sei proba izango dira orotara.

Urtean zehar hainbat udaletan izaten dira lasterketa herrikoiak eta jende andanak hartzen du parte horietan. Kirolari profesionalentzat ez ezik, lagun artean kirola egitea gustuko dutenentzat ere aproposak dira herri lasterketak. Udal bakoitzak erabakitzen eta hautatzen ditu lasterketaren luzera eta ibilbidea. Hala ere, hiri barruan izaten dira gehienak, asfaltozko zoruan eta gehienetan 5 eta 25 km artekoak. Herri lasterketetan herritar orok har dezake parte eta antolatzaileek oso kontuan hartzen dute hori.

Baina argibide gehiagoren bila Juanjo Martinezengana jo dugu, Lasterketa Herrikoien Euskal Herriko Zirkuituko antolatzailearengana, alegia. Euskal Autonomia Erkidegotik harago, Nafarroa eta Iparraldea ere bateratu dituzte proiektu honetan eta izena bera dugu horren adibide. Juanjok esan digu Gipuzkoan, Bizkaian eta Araban baino askoz ere zailagoa izan dela Iparraldeko eta Nafarroako atletismo antolatzaile eta buruak proiektura ekartzea: "Iparraldean hizkuntza bera ere muga izan dugu. Baina Euskal Herri osoa hartu nahi izan dugu eta horregatik saiatu gara", gaineratu du.

Nolako harrera izan du ordea euskal korrikalarien artean herri lasterketen zirkuituak? Zenbat jendek eman du izena lehen urte honetan? Juanjoren arabera, aurtengoa lehenengo aldia da eta ez du jende askok eman izena, baina ez dira gutxi ere. Aurten 30 bat lagun daude, eta horien artean oso neska gutxi. Hori horrela izango zela aurreikusi zuten nolabait, eta jendea erakartzeko hainbat faktore eta pizgarri hartu dituzte kontuan. Lasterketak ez dira oso luzeak, 12 km ditu luzeenak eta ibilbideak ere ez dira malkartsuak. Gainera, antolatzaileak berak azaldu digu sailkapen orokorrean parte hartzeko ez direla zirkuituko 6 lasterketak egin behar, nahikoa da 5 egitea diru-sariak lortzeko lehian sartzeko, eta 4 egiten dituzten korrikalari guztiak sailkapenean sartuko dira. Elastiko bat ere oparitzen zaie gainera.


www.herrikrossa.com, informazio guztia eskura

Herri lasterketen zirkuituko antolatzaileek webgune bat jarri dute martxan Euskal Herrian izaten diren herri lasterketa guztiei buruzko informazioa paratzeko. Euskal Herriko zirkuituaren gaineko datuak ez ezik, gainerako herri lasterketena ere jaso dute bertan. Sailkapenak, lasterketa berriei buruzko informazioa, izena emateko atala, entrenamendu saioak egiteko irizpideak eta korrikalarientzako gomendioak. Hori eta askoz ere gehiago.


Herrikoia, baina lehia puntu politarekin

Zirkuituak araudi sinplea du eta lau maila lehiatuko dira: maila nagusia, beteranoak (A), beteranoak (B) eta beteranoak (C). Irabazlea erabakitzeko lasterketa bakoitzeko sailkapena batuko da, eta kopuru txikiena duena izango da txapelduna. Sei lasterketak osatuko dute zirkuitua baina sailkapena osatzeko bost lasterketaren emaitzak hartuko dira kontuan.

Herrikoiak izanagatik, ordea, ez dugu ahaztu behar herri lasterketak kirol ekintzak direla, eta horrek, ezinbestean, prestatzea eskatzen duela parte hartu eta jardueraz gozatu ahal izateko. Hain zuzen ere, aditu eta kirol-sendagile askorentzat gai hori kezkabide bihurtu da azken aldian. Izan ere, makina bat saiotan gertatu da inoiz korrika egin ez duen jendeak, aurretik inolako informaziorik jaso gabe, lasterketa batean parte hartu eta arazoak izatea. Lesioak, gaixotasunak eta bestelako ondorioak ezjakintasunak eragiten ditu askotan, eta horien aurrean, informatzea eta behar bezala prestatzea da irtenbidea.

Lasterketen egutegia
Betelu
Araitz Betelu, 8 km
(Urtarrilak 22)

Hendaia
Txingudi, 12.2 km
(Martxoak 12)

Etxauri
Etxauri, 7 km
(Apirilak 2, 11:00)

Gasteiz
Ibilaldiak, 6 km
(Apirilak 9, 11:00)

Basauri
Basauriko Miliak, 9,6 km
(Maiatzak 13, 18:45)

Orio
Orio, 10 km
(Azaroak 4, 17:00)

Juanjo Martinez, Lasterketa Herrikoien Zirkuituko antolatzailea: «Atletismoa kirol herrikoiena da, baina ez du inolako ekimen bateratzailerik»

Gizon nekaezina da Juanjo. Ordu erdi inguruko elkarrizketan hainbat aldiz jo du bere sakelakoak. 26 urte daramatza atletismoan. Antxintxika aritzen da, baina horrezaz gain, orduak igarotzen ditu gazte eta helduei prestatzen laguntzen. Euskal Herriko Zirkuitua sortzea amets zaila zela esan digu, baina ez ezin gauzatuzkoa.

Noiz jaio zen Euskal Herriko Herri Lasterketen
zirkuitua sortzeko ideia?
Hasieran, herri lasterketei buruzko informazioa jasotzeko web orri bat sortzeko ideia sortu zen. Orain bi urte, senior azpiko Euskadiko hautatzaile Juanjo Juliok orri bat sortzeko eskatu zidan. Baina ez nuen bideragarria ikusten eta aurreragorako utzi genuen. Hala ere, Juanjok ez zuen etsi eta azkenean, ekin egin nion. Orion herri lasterketa bat antolatu nahi zuten eta hango berri jasotzeko aitzakiarekin jarri genuen abian www.herrikrosa.com webgunea. Ondoren, joan den urtean, aspaldiko amets bati heldu nion, Euskal Herriko Herri Lasterketen Zirkuitua osatzeari, alegia.

Nolako prozesua izan da?
Oso zaila izan da eta korapilatsua. Lasterketa bakoitza udal eta federazio jakin batek antolatzen du eta horiekin guztiekin hitz egin eta asmoak bateratu behar izan ditugu. Zaila izan da ezer irabazi gabe herrialde guztiak proiektuan parte hartzeko konbentzitzea. Askotan pentsatu dut dena bertan behera uztea, baina pena ematen dit. Izan ere, atletismoa kirol herrikoiena da, baina beste kirol jarduera askok ez bezala, ez du inolako ekimen bateratzailerik. Esaterako, mendizaleentzat hainbat martxa eta ibilaldi izaten dira, kultur eta euskara arloko hainbat jaialdi eta ekimen ere badira. Baina atletismoa federazio eta udal bakoitzak bere kontura antolatzen du. Babesle eta laguntzaileak lortzea ere ikaragarri kostatu zaigu, euskal produktuak saltzea zaila delako.

Zeintzuk dira datozen urteetarako erronkak?
Ahal den neurrian puntuetan hobariak eman nahi ditugu. Gainera, prezioa merkatu eta aurtengo ediziokoei ordaindu dutenaren zati bat itzuli nahi diegu, parte-hartzea indartzeko. Gure helburu nagusia bikoitza da, 70 bat korrikalari bildu eta zirkuitua doakoa izatea. Etorkizunean, Lasterketa Herrikoien Euskal Herriko Zirkuitua proba garrantzitsua izatea da antolatzaileon helburua, euskal atletismoaren bilgune izatea, alegia.


Azkenak
Paloma Castro (AEMET Nafarroa)
“Udaberria arrunta izan da eta uda ohi baino beroago izango da”

Ostegunean hasi da uda. Hartara, udaberriko eguraldiaren balorazioa eta udakoaren iragarpena egin du gaur AEMETek. Apirila 1961az geroztik hilabeterik lehorrena izan den arren, udaberri “arrunta” izan da eta uda ohi baino beroagoa izatea aurreikusi dute.


2024-06-21 | Sustatu
AA irudien lehiaketa batean tranpa, benetako argazkia aurkeztuta

Interneten oinarria duen argazkigintza lehiaketa batean, 1839 Color Photography Awards delakoan, tranpa gertatu da. Kategoria berezia sortu zuten 2024ko ediziorako, Adimen Artifizialeko irudiak aurkeztekoa, eta irabazleak tranpa egin zuen, argazki erreala aurkeztuta irabazi zuen... [+]


2024-06-21 | Gedar
Gasteizko Azkena Rock jaialdiko lan-baldintza miserableak salatu ditu Laneko Autodefentsa Sareak

Last Tour enpresa eta Gasteizko Udala seinalatu ditu erantzule gisa, azken horrek "langileon prekaritatea finantzatzen eta legitimatzen" duela nabarmenduta. Azkena Rocken aritu diren hainbat langileren lekukotzak bildu ditu LASek.


Kike Diaz de Rada hil da, aktore, antzerki zuzendari eta idazle donostiarra

64 urterekin, Kike Diaz de Rada donostiarra hil da, Eneko Olasagasti lankideak asteazken arratsean sare sozialetan jakinarazi duenez. Ibilbide luzeko aktorea izan zen eta Tanttaka teatroaren eta Orain gipuzkoar antzerki taldearen sortzaileetako bat.


Eguneraketa berriak daude