Pasaiako Alkartasuna dantza taldeak Euskadiko Gipuzkoar Aurresku Txapelketa 25 urtez antolatu ostean, gehiago ez antolatzea erabaki du eta Euskal Dantzarien Biltzarraren esku utzi. Askatasunak adierazi duenez,aurreskua berreskuratzea, ezagutaraztea eta indartzea zuten helburu Txapelketa sortu zutenean eta alde horretatik, helburua bete dela adierazi dute. Bestetik, aurreskua gehiegi bateratu dela, dantzarien artekoa lehia biziegia dela eta Txapelketa egiteko instalazio desegokia izan dituztela argudiatu dute. Hala, txapelketei buruzko eztabaida pil-pilean da. Dantza garatzen lagundu dutela diote batzuek eta teknikari balio handiegia ematen zaiola diote beste batzuek, beste ezaugarrien kaltetan. Aurten Txapelketa egingo dute, baina formatu aldetik hainbat aldaketa egingo dizkiotela jakinarazi du Euskal Dantzarien Biltzarrak.

Azken 4.000 urteetan emakumeen modak izandako garapena ikus daiteke Gasteizko Vital Kutxa fundazioaren aretoan. Isabeldar garaikoak, barrokoak, Herbeheretakoak, Alemanian 1560an boladan zeudenak... guztira berrogeita hamalau jantzi ipini dituzte Modaren papera historian zehar erakusketan. Jantziok, ordea, paperarekin egin dituzte tamainu errealean eta benetakoak dirudite ia. Azken mendeko diseinatzaileen jantzien paperezko erreprodukzioak ere ageri dira manikietan. Dior, Chanek, Pertegaz, Balentziaga, Yves Saint Laurent nahiz Agatha Ruiz de la Pradarenak. Urtarrilaren 25a arte izango da paperezko artelan hauek ikusteko aukera.

Badirudi Donostiako Kultura Garaikidearen Nazioarteko Zentroaren (CICC) proiektua hezur mamitzen ari dela. 2001ean jakinarazi zuten Donostiako tabako fabrikan kultur garaikide zentro bat sortuko zutela. Hainbat komunikabidetan agertu denez, Erakundea sustatzen duten Eusko Jaurlaritzak, Gipuzkoako Foru Aldundiak eta Donostiako Udalak erabakita dute zein lan taldek kudeatuko duen proiektua, baina ez du oraindik izendatu, kontratuak egiteko hainbat arazo tekniko izan direlako. Informazio horien arabera, egun Arteleku zuzentzen duen Santi Eraso izango litzateke edukien zuzendaria, kudeaketaz José Miguel Aiertza Kursaal elkarteko kudeatzailea arduratuko litzateke eta arkitekturaz egun EHUko Arkitektura Eskolako zuzendari Iñaki Galarraga. CICCren sustatzaileek urtarrilean egingo dute hurrengo bilera eta orduan hartuko dute erabakia.

Gauza guztiak gordetzeko ohitura zuen Jorge Oteiza artistak. Eta gauza horiek guztiak (6.000 liburu, 4.000 liburuxka, 3.000 argazki, 4.000 gutun...) sailkatu berri dituzte Altzuzako Jorge Oteiza museoko dokumentazio zentroan. Carlos Martínez hasi zen joan den hamarkadan lan horrekin eta dokumentazio zentroko telnikariek bukatu dute. Hurrengo pausoa sailkatutako material guztia digitalizatzea izango da, ikerlari eta adituek eskura izan ditzaten. Horrez gain, dokumentazio zentroak argitalpenak plazaratuko ditu urtero; aurten Oteizaren lan poetikoaren berrargitalpen kritikoa egingo du.

Urtarrilaren 7an Berriobeitin (Nafarroa) egingo da aurtengo Hatortxu rock kontzertua. Euskal presoekiko elkartasun kontzertu honetan Soziedad Alkoholika, Kuraia, Lehendakaris Muertos, Kaotiko eta Etsaiak taldeek parte hartuko dute. Ondoren, DJek hartuko dute lekukoa.

Zuzendaritza eszenikoko bi urteko ikastaroa eskainiko du urtarriletik aurrera Bizkaiko Antzerki Ikastegiak. Barakaldon egoitza duen antzerki eskolak pauso bat harago eman nahi du horrela arte eszenikoetako ikasketetan. Klase teorikoak jasotzeaz gain, praktikak egiteko aukera izango dute ikasleek. Besteak beste, Noel Witts, Joseba Lazkano, Fer Montoya eta Jordi Cortés izango dituzte irakasle. Era berean, lau beka izango dira, ikasleek Polonian eta Indian zuzendaritza praktikak egin ditzaten.