Argitalpenak


2005eko abenduaren 25an


Gorbeiako haizea
Gontzal Mendibil
Keinu
322 orrialde
19 euro


Gontzal Mendibilen lehen nobela

Duela gutxi hil zaion aitari zuzendu zaio Gontzal Mendibil idatzi duen Gorbeiako haizea estreinako eleberrian. Narrazioan zehar, ordea, hiru belaunaldiren bizitzako pasadizioak azaltzen ditu: bere aitonarena, betirako joan berri zaion aitarena eta Gontzal Mendibilena berarena ere, Zeanuri eta Gorbeia aldeko herrien eta herritarren bizipenekin batera. Barruko sentimenduak agertarazi nahi izan ditu zeanuritarrak lan honetan, aitari esateko gogoa izan bai, baina sekula esatea erabaki ez zuen gauza haiek guztiak. Eta horretarako, bizitza eta heriotza, denbora eta memoria, adiskidetasuna eta maitasuna, kultura eta politika, 1936ko Gerrak utzitako mina, aitite Adolforen burutazioak eta beste ekarri ditu kontura, inoiz ahaztu nahi ez lituzkeen gertaerak.


Pentsaera basatia
Claude Lévi-Strauss
Gaiak
414 orrialde


Lévi-Strauss totemismoaren atzean ezkutatzen den logikaz

Claude Lévi-Strauss antropologia modernoaren sortzaile eta mugimendu estrukturalistaren aitzindaria izan zen. Pentsaera basatia lanean, pentsamendu greziarra sortu baino askoz lehenago existitu zen totemismoaren atzean ezkutatzen den logika ikertzen du, eta mundu garatuaren maila berean jartzen. Antzinako gizarte haiek unibertsoa sistema holistiko eta organiko gisa ikusten zuten. Zientzia modernoak, ordea, beste maila estrategiko batera zuzendutako sistema logiko bat sortu zuen, eta antzinako mundu hura suntsitu egin zuen. Claude Lévi-Straussek aintzinako gizarte "hotz" eta agrafo haien logika ikertzen du batik bat Pentsaera basatian, baina gaur egungo gizarte "beroek" sortutakoarekin alderatuta.

Idoiaren agenda/ Gariren agenda
Fernando Morillo
Ikastolen Konfederazioa/ Elea
76+50 orrialde
12 euro


Bi agendaz osatutako gazte nobela

Euskal Herriko Ikastolen Konfederazioak eta Elea argitaletxeak elkarrekin kaleratu duten Fernando Morilloren liburu honek egitura bikoitza du, neska-mutil biren isileko agendaz osatua baitago. Gazteei zuzendutako lana da eta, jakina, gazteak dira protagonistak: Etxean istilu franko dituen neskatoa -Idoia-, huraxe zeharo liluratu duen 26 urteko morroi misteriotsua -Jon Idoiarentzat/Jagoba Garirentzat-, eta azken honen lagun den marrazkilari gaztea. Hiruron arteko harreman korapilatsuan sentimenduak, gezurrak eta kontraesanak dira nagusi. Idoiak aspalditik zuen amaren etxetik alde egiteko nahia; etxea bilatu eta halaxe egingo zuen, bere neba txikiarengatik kezkaturik egongo ez balitz. Jon ezagutu eta bere biltegira eraman zuzenean, pozik zegoen neska, baina halako batean Jon desagertu egingo da.


Etecé
Batzuen artean
Amasté Comunicación
82 orrialde


Etecé 15-17 urteko nerabeen bila

Bilboko Amasték kaleratzen duen Etecé aldizkariak bere azken zenbakian dio aldizkari berri bat egiteko jende bila dabilela. Baldintzak hauxek dira: 15-17 urte arteko gazteak izatea, edo nerabe hauekin harreman asko izatea. Beraz, jakinaren gainean zaudete. Bestelakoan, beti bezala berri ugari dakartza: Love & Rockets, La Cúpula, Gomer eta bestek egindako komikien gainekoak; Madrilen ospatutako Cinemadi buruzkoak; hil arte Rolling Stones taldeko partaide izan zen Brian Jones musikariaren bizitzaren gainean egin duten filmaz diotena; Anariren Zebra diskoaz, The Decemberists taldearen Picaresquez, Makalaren Hondartzan CDaz eta beste albumez azaldutakoa; Nafarroako Ertz taldeak eta Greziako Electrographek elkarrekin Artelekuren laguntzarekin sortutako egitasmoa...


Munduko
hamar ipuin
Carmen Ibarlucea Paredes
Gatuzain
144 orrialde
10 euro


Norberaren eta besteen heziketarako lagungarri

Maien zibilizazioak utzitako ipuin batetik hasita, Tanzaniako lurraldeetan bizi den wagogo herriko kontakizuna, Beningo fon herrikoa, Txilen eta Argentinan kokaturik dauden maputxeena, hinduen istorio bat, islandiar jatorria duen beste bat, Nigerian eta Burkina Fason kontatzen diren ipuin bi eta Ozeania aldetik datorkigun Papua Ginea Berriako istorioa bildu ditu Munduko hamar ipuin. Norberaren eta besteen heziketarako lagungarri izenburuko liburuan Carmen Ibarlucea Paredesek, herri horien guztien filosofiaren hazia geuregana hurbiltzeko asmoz. Hala ere, haien ikuspuntu sozial arkaikoak gaur egun guk ditugun beste balore batzuei eraso egiten dietenean, gurera egokitu ditu biltzaileak.


No
Patxi Salaberri
Pamiela
78 orrialde / 12,60 euro


Emakumearen begiradatik sortutako poemak

Androginoaren mitoaren itzalpean sorturiko poema liburua da Patxi Salaberri Muñoak izenpetzen duen No (Poema akrilikoak). Izan ere, egileak azpimarratzen duenez, poema hauek gizon bat dute artifize, baina emakumea egilea, asko eta asko emakume baten begiradatik adieraziak izan direlako. Liburuan agertzen diren hogeita hamazazpi poemak, ezaugarri gisa, badute bitalismotik, eta baita nihilismo gorrienetik ere. Eta errealitate diskriminatzailea agertzen dute, itxaropenari zirrikiturik uztea ahaztu gabe.


Note book
Pako Aristi
Erein
160 orrialde
15,01 euro


Pako Aristiren azken gogoetak eta fikzioa

Kazetari ikuspegia, fikzioa eta poesia erabili ditu Pako Aristik Note book deritzan bere azkeneko gogoeta eta narrazioen bilduma osatzerakoan. Neoliberalismo ekonomikoan murgildurik dagoen mundu honetan jaiotzetik hil arte gabiltzanon joan-etorria dute ardatz nagusi liburuan biltzen dituen hirurogeita hamabost piezek. Saioa, nobela, ipuinak, haur literatura eta poesia landu dituen Urrestillan sortutako egile honen aburuz, hiru mailako banaketa soziala, aberats, klase ertain eta langileena bitara murriztu da gaur egun, kontsumitzeko gai direnen eta ez direnen artean. Eta Pako Aristik irudipena du mundu honek ez duela konponbiderik izango dirua irabaztea ondo ikusten dugun bitartean, diru asko edukitzeak bizitzako ateak ixten dizkiolako daukanari, eta ez daukanari bizitzeko aukera guztiak galarazten dizkiolako. Beraz, aberastasunari mugarik jarri ezean, munduko miseriak mugagabe hazten jarraituko duela ondorioztatzen du, eta horregatik bakarrik nahiko luke azken lan honetan jarri dituen hitzak milioika aldiz fotokopiatuak izatea, dirua irabaztea ederra dela sinetsarazi digun publizitate astunaren muga guztiak gaindi ditzaten.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude