Dagoeneko prest du Bertsolari Txapelketa Nagusia Bertsozale Elkarteak. Urriaren 9an izango da lehen azken laurdena Lekunberrin. Azaroaren 8an finalaurreko lehen saioaren txanda izango da eta finala abenduaren 18an izango da Barakaldoko Bilbao Exhibition Centerren (BEC). Hamabi saio, guztira. 38 bertsolarik hartuko dute parte Txapelketan. 28 urte dituzte, bataz beste. Bi dira arabarrak, hamar bizkaitarrak, hemeretzi gipuzkoarrak, hiru lapurtarrak eta lau nafarrak. Andoni Egaña eta Maialen Lujanbio zuzenean igaroko dira finalera, 2001eko Txapelketa Nagusiko irabazlea eta txapeldunorde izanagatik.
Aurten berrikuntza ugari izango ditu Txapelketak. Musika propioa izango du, Oreka Tx taldeak egindakoa. Txapelketa giroa zabaltzeko, Zizurkilgo antzerki taldeak kale animazioak egingo ditu hainbat herritan. Bertsolaritza komunikabideetan jorratzeko irizpideen gaineko ikastaroa eskainiko dute Jon Abril eta Karlos Aizpuruak Donostian irailaren 26an. Antolatzaileek dioten moduan, pasa hitza.

25 urte bete zituen iaz Santurtziko Nazioarteko Antzerki Jaialdiak. 26. aldi honetan berrikuntzak dakartza: iraupen luzeagoa izango du eta ikusle guztiengana hurbiltzeko saiakera egingo du programazioaren bitartez. Irailaren 30ean hasiko da eta azaroaren 25a arte makina bat lan eskainiko du: L'Omprevísen Quijote, Res de Resen Icars, Dagoll Dagomen Mikado... Urriko lehen asteburuan kaleak hartuko du protagonismoa, Producciones Imperdiblesen Réquiem 21K 625 eta Markeliñeren Carbón Club antzezlanekin. Azaroan iaz Antzerki Testuen Serantes Saria eskuratutako Jokin Oregiren Ezin dut egia esan lana estreinatuko dute eta azaroaren bukaeran aurtengo Serantes sariak jakinaraziko dituzte.

Azken urteetan polemika dezente izan da Euskadi literatur sarietako finalista izateko, hautatutako egileek sarien oinarrien onarpena sinatu behar zutelako. Iaz Jon Alonso eta Xabier Montoiak ez zituzten oinarriak sinatu eta epaimahaiko kideek beren obrak aintzat hartzea erabaki zuten eta bietako baten obra sariduntzat jotzekotan, saria hutsik uztea. 2003an ere Koldo Izagirrek uko egin zio itzulpen arloko Euskadi sarien oinarriak sinatzeari. Hemendik aurrera, hautatutako egileek ez dituzte oinarriak sinatu beharko finalista izateko. Horixe dator jasota EAEko buletinean, maiatzaren 30eko data duen 6. artikuluan.

Dantza garaikidearen erakusleiho izateko jaio zen Dantzaldia. Aurten seigarren edizioa du, eta urtero gisa, Bilboko La Fundición aretoko langileak arduratu dira Euskalduna jauregian egingo den jaialdiaren programa osatzeaz. Urriaren 2an hip hopa eta musika klasikoa uztartuko ditu Käfig konpainia frantsesak. Zuzeneko musika izango du Herbehereetako Leine & Robeana taldeak urriaren 16an eskainiko duen emanaldiak. Koen Augustijnen belgikarraren laugarren koreografia dantzatuko dute azaroaren 13an, baleta, dantza modernoa, break dance eta kanta tradizionalak jorratzen dituen lana. Amaitzeko, azaroaren 27an Pàl Frènak Frantziako konpainiak bi koreografia eskainiko ditu.

Eusko Ikaskuntzak Euskal Herriko eta diasporako euskaldunen harremanak eta komunikazioa sustatzeko sortutako EuskoSare (www.euskosare.org) proiektu birtuala Interneten da jada. Webgunean euskaldunentzat interesgarri diren albisteak eskaintzen ditu, besteak beste. Eduki ugari du: diasporako euskal erakundeen datu basea, abizenei buruzko informazioa... Familiarteko Topaketa Programaren baitan, migrazioengatik harremana galdutako familiak lagundu nahi dituzte.

Ekainean ekin zion ETBk kulturaren gaineko erreportajeak eskaintzen dituen EITB Kultura emititzeari. Saioak maila ona duena iritzita, berriz ere emititzen hasi dira udako etenaren ondoren. Bideo sortzaileentzat lehiaketa antolatu du saioak, EHUko Arte Ederretako fakultatearekin elkarlanean. Aukeratutako lanak saioan emango dituzte eta denboraldiaren amaieran irabazleak jakinaraziko. Uda hasieran estreinatutako Wazemank umore saioa ere urrian itzuliko da. Anjel Alkain aktoreak zuzendutako taldeari Mikel Laskurain eta Ana Alordi aktoreak batuko zaizkio denboraldi honetan.

Idazketa literarioan eta idazketa profesionalean trebatzeko bi urteko graduondokoa eskainiko dute hirugarrengoz Euskal Idazleen Elkarteak, Eusko Ikaskuntzak eta Bergarako UNEDek. Horrez gain, Idazleak Irakurle. Hilean behin, Andu Lertxundirekin zikloa apailatu dute erakunde antolatzaileek. Hilean behin, Andu Lertxundirekin, bere obrak, irakurketak eta hausnarketak partekatu ahal izango dituzte parte hartzaileek.