Gaur egunera arteko enpresa antolamenduaren diseinua 1991ko berbera da. Beraz, bada garaia, diseinu hori berrikusteko eta gaur egungo nahiz etorkizun hurbileko moldeetara ekartzeko. Are gehiago kontuan hartuta MCC taldeak gaur egun 18.593 milioi euroko aktiboak eta 3.757 milioi euroko baliabide propioko egiturak dituela eta Euskal Herrian nahiz atzerrian dauzkan industria, merkataritza eta finantzako plantetan 71.000 pertsona inguru ari direla lanean. Gainera, etorkizun hurbilari begira, 2008. urterako beste 25.000 lanpostu sortzeko apustua egin du. Aurreikuspenak betetzen badira, MCCk 95.000 langiletik gora izango ditu.

Kooperatibaren ez ohiko kongresuan onesten den antolamendurako diseinu berria 2006ko urtarrilaren 1ean aplikatzen hasiko dira. Hala dirudi aldizkari honek eskuratu ahal izan duen informazioaren arabera.

Kooperatibak diren enpresetan, batez ere MCC bezain korporazio handietan, erabakiak mantsoago hartu ohi dira enpresa pribatuetan baino, azken horietan zuzendaritzak hartzen baititu erabakiak, langileak ia kontuan hartu gabe. Kooperatiben kasuan, aldiz, kooperatibistak izaten dira eztabaidaren protagonistak. Horregatik dago MCC azken hilabeteetan eta urrira arte eztabaida betean; kooperatibek, taldeek eta dibisioek (ikus koadroan) enpresa antolamendua egokitzeko beharra dute eztabaidagai. Azpimarratzekoa da MCC taldeak antolamendua egokitzeko proiektua batez ere Industria Taldeari begira egin duela eta, hori dela-eta, MCC osatzen duten gainontzeko taldeen funtzionamendua -banaketarena (Eroski) edo finantzena (Euskadiko Kutxa, Lagun Aro, eta abar)- ahalik eta gutxien oztopatzen saiatu da.

Zenbait berrikuntza garrantzitsu ezagutu ditugu eskuratu ahal izan dugun txostenaren bidez -esan digutenez, txosten garrantzitsuena-. Honakoak dira azken hilabeteotan eztabaidatzen ari diren berrikuntzak: dibisioak gehitzea eta bakoitzari bere izaera juridikoa ematea, dibisioak koordinatuko dituen Industria Kontseilua eratzea, eta Jarduera Berriak Sustatzeko Zentroa sortzea -ikus koadroa-.

Ez ohiko kongresuan erabaki beharreko gaietako bat izango da gaur egun dauden 72 industria kooperatibak 11 dibisiotan banatu edo ez. Hain zuzen ere, dibisioak izango lirateke kooperatiben eta korporazioaren arteko lotuneak. Industria Kontseilua eratzea ere proposatu da. Organo horrek koordinatuko lituzke dibisioak; hori eratzeko irizpide irekiagoak proposatzen dira. Bestalde, Industria Taldearen antolamendua egokitzeko proposamenaren barruan zera jarri da mahai gainean: bata bestearen intereseko taldeak eratzea, kooperatiben arteko sinergiak hobeto aprobetxatzeko.

MCC kooperatibaren ez ohiko kongresuan hartuko diren erabakiek ez diote Industria Taldeari bakarrik eragingo. Pentsatzekoa denez, euskal kooperatiba talde osoan izango ditu ondorioak. Hori dela-eta, taldea osatzen duten kooperatiba guztietan dago eztabaida: Industria Taldean, Finantza Taldean -Euskadiko Kutxa eta abar- eta Banaketa Taldean (Eroski). Antolakuntza konplexuena Industria Taldeak dauka, kooperatiba asko direlako, geografikoki oso barreiatuta daudelako, hainbat sektore daudelako tartean, eta abar. Alabaina, nekez imajina daiteke MCC osoan eraginik izango ez duen Industria Taldeko antolamenduaren birmoldaketarik.

Kongresurako egindako ekarpenetako batean adierazten denez, MCC osoari begira, korporazioko organoen adierazgarritasun eta eraginkortasunerako mekanismoak optimizatuko direla da antolamendua egokitzeko proiektuak ekarriko duen hobekuntza nagusia.