Aspalditik elkar ezagutzen bazuten ere, kontzertuak ikusteko zaletasunak batu zituen Aterkings taldeko partaideak. Izan ere, askotan egiten zuten topo emanaldiak ikustera joaten zirenean. Musika gustu antzekoak zituztela ikusirik, ostiralero bertsioak jo eta ongi pasatzeko elkartzen hasi ziren Markinan. Little Richard, The Stooges eta The Isly Brothers bezalako rock & roll talde mitikoak bertsioneatzen hasi baziren ere, taldeko partaideen aurrekari ezagunenak pop mundutik datozkigu. Martxelo Mendizabal (bateria) eta Alberto González (gitarra) 6nemen9 taldean aritu ziren eta Iker Etxeberria (baxua) eta Mikel Txurruka (gitarra), berriz, Taupada taldean. "Gertatzen dena da, agian, jo izan dugun taldeetan ez genuela normalean entzuten dugun musika egiten. 6nemen9 taldearen kasuan, entseatzen hasi baino lehenago Albertok eta biok beti jotzen genuen rock kantaren bat, bertako talde rockeroren baten edo REM-en bertsioren bat, adibidez", esan du Martxelo Mendizabal bateria joleak. Iñigo Goikoetxea abeslaria da musika munduan berriena, abeslari eta baxu jole bezala aritu izan da aurretik.


Aterkingsek rock & roll klasikoan ditu erreferentzia nagusienak, 40ko hamarkadako taldeetatik hasita gaur egunera arteko bandetara: Little Richard, The Stooges, MC5, garajea, psikodelia, surf musika, rock australiarra. Hala ere, ez dute punk estiloa albo batera uzten. Ramonesen eragina da kasu horretan nabarmenena. Dena den, Euskal Herriko taldeak ere gustuko dituzte. Adibidez, Buenavistako soinua dute laket: Nuevo Catecismo Católico, Señor No... "Behin kazetari batek diskoa Ruta 66 aldizkariko urte guztiko artikuluen laburpena dela esan zigun", diosku Alberto González gitarra joleak.

Rock'n'roll joan zen otsailean grabatu zuen talde markinarrak Urdulizeko Tio Pete estudioetan, José Lastra teknikari zutela. Zuzenean duten freskotasuna lortzearren, taldeak sesioan, guztiak batera, grabatzea erabaki zuen. Eta emaitzarekin oso gustura gelditu dira. Emanaldietan ere Tio Peteko teknikarietako bat arituko da beraiekin, Jon Llamosas, hain zuzen ere.

Gaztelupeko Hotsak zigiluarekin argitaratu dute beren estreinako lana, esentzian taldea deskribatzen duen titulua daraman diskoa: Rock'n'roll. Garbi ikusi zuten beraien musika mundu anglosaxoitik datorren rock & roll esaerak definitzen zuela. Markinarren izenak ere badu ingelesetik zerbait, ez dena ordea. "Itziarren bada Egurs izeneko enpresa bat. Ikerri nonbait asko gustatu zitzaion ahoskatzerakoan zuen soinua eta ingelesez aterkiari txantxetan aterkins esaten hasi zitzaion. Gero "g" bat gehitu eta listo. Horrela sortu zen izena", diosku Goikoetxea abeslariak. "Euria egiten zuen", azaldu du barre artean Iker Etxeberriak. Diskoaren azala eta kontrazala, berriz, oso Markinakoak dira. Azalean, frontoian duela urte asko ateratako argazki zahar bat ikus daiteke, ume zestalari piloa eta epaileak publikoa agurtzen agertzen dira bertan. Atzean, aldiz, bi zestalariren argazkia.

Azkenean Rock'n'roll diskoa zigilu euskaldun batek argitaratu badu ere, lehenengo eskaintzak kanpotik etorri zitzaizkion talde markinarrari. Izan ere, Kike Turmix izan zen taldearekin interesatu zen lehena. Turmix duela urte asko Madrilen bizi den musikari eta ekoizle bilbotarra da eta bera izan zen, hain zuzen ere, Aterkings disko bat grabatzera animatu zuena. "Turmixen asmoa diskoa Xixonen grabatu eta gero berak edo Madrileko zigilu lagun batek argitaratzea zen. Egia esan, guk ez genuen disko bat grabatzeko asmorik; berak berotu gintuen. Sinesgarritasuna eman zigun Turmixek", dio Alberto González elgoibartarrak. Kike Turmix Pleasure Fuckers rock taldeko partaidea da eta dagoeneko martxan ez dagoen Safety Pin records zigilua sortu zuen duela zenbait urte. Horrez gain, Eskandinaviatik rock talde ezagunen zuzenekoak ekarri izan ditu, Hellacopters eta Glucifer, kasurako. Hain zuzen ere, azken hauekin aritu ziren Aterkings taldekoak, Kafe Antzokira etorri zirenean. Azkenean gertutasunak ematen duen segurtasunak konbentzitu zituen markinarrak eta Gaztelupeko Hotsak zigilua izan da Rock'n'roll karrikaratu duena. Hala eta guztiz ere, Turmixekin harremanetan jarraitzen du banda bizkaitarrak eta horrek Espainian hainbat kontzertu eskaintzeko parada eman dio. "Kanpoan harrera ona izan dugu. Egia esan Goikok kristoren espektakuloa eskaintzen du eta jendea ez da ohartzen zenbat kanta egiten ditugun euskaraz eta zenbat ingelesez. Jendea jarrerarekin gelditzen da", diosku Alberto Gonzálezek.


Diskoan euskara, ingelesa eta gaztelera entzun badaitezke ere, hasieran kanta gehienak ingelesez egin zituzten. "Guk entzuten dugun musikaren %90 ingelesez abestua da, horregatik, askotan gure atentzioa ez da letratan zentratzen", adierazi digu González gitarra jole elgoibartarrak. Euskal Herriko diskoetxe batekin argitaratzeko baldintzetako bat euskaraz kanta gehiago abestea zen. Horrenbestez, hainbat kanta euskaratu egin zituzten. Ez zuten beren burua euskara batuan abesten ikusten eta horrexegatik, markinarrez kantatzen dute. "Markinarrez, baina rock ukituz", dio Martxelo Mendizabal bateria joleak barre artean. Ingelesez entzun daitekeen kanta horietako bat da, hain zuzen ere, diskoko bertsio bakarra. The Beatles eta The Rolling Stones taldeek 60ko hamarkadan ezagun egin zuten Money, The Isly Brothers taldearen kanta. "Hasieratik egiten dugun bertsioa da Money, eta egia esan geure hastapenei egin diegun omenaldi txikia izan da diskoan sartzea", dio Gonzálezek.