Split 77: Dantzarako gogoz


2005eko otsailaren 27an
Gitarra, ahotsa, bateria, baxua eta teklatuak dira Split 77ren osagai instrumentalak. Beti entzun izan duten musika egiten gozatzeko aukera ematen dieten elementuak. Izan ere, patuarekin lotzen baitute bilbotarrek beraien bigarren lana. Eta hain zuzen ere, horra hor Mentura tituluaren nondik norakoa: betidanik zainetan izan dutena egitera iritsi direla alegia. Orduan, gaztetxoak, umeak izan arren, 80ko hamarkadako musikak eragin izugarria izan zuen laukote bizkaitar honengan. Garai hartako irrati formulek eskaintzen zituzten kantek zentzu berezia hartu zuten urteen joan-etorrian. Eta musikaren munduan sartu ahala doinu haiek beren erara erreproduzitzeko beharra sentitu dute. Batez ere, lan berriak uzten ditu agerian talde bizkaitarraren jatorriak. "80ko hamarkadako musika ilunak, After-punkak eta Joy Division edota Depeche Mode bezalako taldeek eragin handia izan zuten musika ulertzeko daukagun moduan", diosku taldeko kide Aritz Aranburu kantari eta gitarra joleak. Haurtzaroa berrinterpretatzeko aukera eskaini dio lan honek banda bilbotarrari. Laurogeiko hamarkadak zuen modernitatea berrinterpretatzen saiatu dira azken batean, baina era berean gauza berriak eskaintzen. "Erritmo aldetik laurogeiko hamarkada oso koadratua da, oso finkoa. Eta horren inguruan gauza oso interesgarriak daude guretzat. Bateria batekin sekuentziak lantzea eta horrelako gauzak oso interesgarriak dira. Eta gainera, azken lan honetan horrelako gauza asko egin dugu", diosku Aranburuk. Hamarkada batetik bestera pasatzean urek korrontez aldatzen dute eta hain zuzen ere horixe da egin nahi izan dutena. Laurogeita hamarreko hamarkadan grunge asko entzun eta egin zuten Split 77ko partaideek. Horregatik, horrekin apurtu eta entzuleari zerbait berria eskaintzea izan da beraien asmoa.

Aritz Aranburu gitarra jole eta abeslariaren ustetan, Antenna izeneko lehen lana taldearen hasierako ibilbidearen bilduma da. Tempo erdiko kanta asko jasotzen dira bertan, adibidez. Besteak beste, horixe izan da lan berriarekin albo batean utzi nahi izan dutena. Azken batean, gauean entzuteko eta dantza egiteko diskoa sortzea zuen buruan talde bizkaitarrak.

Urdulizeko Tío Pete estudioa izan da Menturako doinuak jasotzeaz arduratu dena. Aurrekoan bezala, José Lastra izan da grabaketaz arduratu dena. "Lastrarekin beti gauzak poliki eta kontu handiz egiten ditugu. Gauza guztiak kontrolatzen saiatzen gara. Zein norabide hartu nahi dugun finkatzen dugu eta hori lortzeko estudioan giro aproposa bilatzen ahalegintzen gara", azaldu digu Aranburuk. Ohiko rock instrumentuez gain elektronikaren bidea jorratzeko arreta handia jartzen du talde bilbotarrak kanta bakoitzean erabili beharreko instrumentazioaren inguruan.

Itoitz, Joy Division eta Nico

Mentura lan berrian uzta propioko kantak zein bertsioak aurki ditzakegu. Guztiak Split 77ren era berritzailean interpretatuak. Aipatu moldaketa horien artean, adibidez, Itoitzen Espaloian abestia entzun dezakegu. Izan ere, talde bilbotarraren aburuz, Itoitz gabe 80ko hamarkada beste gauza bat izango litzateke. "Gainera, abesti horretan guk gustuko ditugun gauza asko ikusten ditugu, aurpegi zuriak, arropa ilunak... Eta beraz, gure taldearen nortasunarekin bat zetorrela ikusi genuen", dio Aranburuk. Bestalde, Itoitzena ez da diskoan entzun dezakegun moldaketa bakarra. Taldearen sustraiak zeintzuk diren argi uzten du Joy Divisionen Isolation kantaren bertsioak. Horrez gain, Jackson Browne musikariaren konposaketa batean oinarrituz Nicok sortu zuen The Fairest of the Seasons kantua ere biltzen dute lan berrian.

Moldaketak edo bertsioak egiten direnean musika taldeek beste konpositore batzuen lanak hartu ohi dituzte oinarri. Bestalde, eta era tradizionalean egin izan bada ere, teknologiak eta elektronikak norbere kanten ikuspegi berriak agertzeko parada eskaini die egungo musikariei. Remix edo birnahasketez dihardugu. Izan ere, Split 77k diskoan bertan dauden konposaketa berrien birnahasketak ere sartzen baititu Mentura lan berrian. Felix Daniel bilbotarra izan da, hain zuzen ere, talde bizkaitarraren abestien ikuspegi berri hori erakusteaz arduratu den DJetako bat. "Disc Jockeyaren figura sartu nahi genuen. Azkenaldian Bilboko gauean DJak garrantzi handia duela konturatu gara. Izan ere, DJ on batek gau oso batez jendea dantzan izan dezake", esan du taldeko kantari eta gitarristak.

Oteiza eta disko zenbakituak

Diskoa grabatzea pentsatu zuenean laukote bilbotarrak argi zuen musika bereziaz gain, bere publikoari diseinu berezia ere eskaini nahi ziola. Igor Zorrotzua diseinatzaileak ordurako Oteizaren desokupazioa zuen buruan. Eta ideia horretatik dator, hain zuzen ere, azalean agertzen den trokela. Horrez gain, Aritz Aranburuk Mentura tituluarekin ere lotzen du trokela eta desokupazioaren kontzeptua. Dena den, hori ez da talde bilbotarrak diseinu aldetik eskaintzen duen berrikuntza bakarra. Izan ere, CD bakoitza bakarra da eta ez dago berdina den besterik: ale bakoitzak bere zenbakia du. Ale guztiak eskuz landu dituzte taldeko kideek, azala tolestu, enpaketatu, pegatinak ipini...

Azaroan argitaratu zuten Mentura eta orduan kaleratutako ia seiehun aleak agortu dira dagoeneko. Split 77ren asmoa diskoaren bigarren tirada bat egitea da. Hori bai, ez aurretik zenbait berrikuntza egin gabe. "Tirada berrian diskoak diseinu berri bat izango du eta jende berriak hartuko du parte, agian, Josetxo Anitua eta Miki Puigek. Jendearengan interes handiagoa pizteko asmoz, beharbada, kanta gehiago ere sartuko ditugu", aurreratu digu Aranburuk.

Saioa ingelesarekin

Antenna izeneko lehen lanarekin Eskozia bisitatzeko aukera izan zuen talde bilbotarrak. Aberdeen hiriko Go North jaialdian parte hartu zuen Muse, Paul Weller, Shed Seven eta Placebo bandekin batera. Garai hartan euskaraz abesten zituzten kanta guztiak. Menturarekin uzta propioko zenbait kanta ingelesez abestera ausartu dira. Hala eta guztiz ere, ez da bilbotarren helburua ingelesez bakarrik abestea eta aurrerantzean euskaraz abesten jarraituko dute.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude