Garzon berriz Udalbiltzako kideen aurka
Ezker Abertzaleak kudeatzen duen Udalbiltzako hamaika pertsona deitu ditu deklaratzera Baltasar Garzonek Auzitegi Nazionalera. Jasone Astibia, Expe Uriarte, Juan Karlos Alduntzin, Joxean Barandiaran, Miren Odriozola, Urko Irastorza, Iñaki Olalde, Xefe Ziarrusta eta Maribi Ugarteburu dira Garzonen aurrean «talde armatuko kide izatearen» akusazioari aurre egin beharko diotenak.
Zalaparta Mexikon sei euskal herritarren estradizio eskaerarekin
Marta Maria del Carmen Hernandez Mexikoko epaileak, bertan behera utzi du sei euskal herritar estraditatzeko berehalako arriskua. Mexikon espetxean diren sei euskal preso hauek, babes helegitea jarri zioten Espainiako Gobernuak egin eta Mexikokoak onartu zuen estradizio eskaerari, sakoneko akatsez josia dagoela argudiatuz. Aipatu epaileak helegitea onartu du eta pentsatzen da berau onartu ala atzera bota arte urtebete ere igaro daitekeela. Estradizio auzi honek zalaparta sortu du Mexikon eta, esaterako, Kongresuak berak ere »bere Batzorde Iraunkorra medio» estradizio saioa aztertzeko eskaera egitea eskatu dio Giza Eskubideen Nazio Batzordeari. Batzorde Iraunkorraren ustez, estradizio eskaeraren bideratzean badira zantzuak pentsatzeko arrazoi politikoak arrazoi juridikoei gailendu zaizkiela, eta hala balitz, Vicente Foxen Gobernuari estradizio eskaeraren onarpena berraztertzea eskatzen dio.
ETAren berragerpena
Uda aurretik makina bat hitz egin zen ETAren balizko su-etenaz. Hilabete luzetan ekintza armaturik egin ez izanaren ondorio ziren zurrumurruok eta erakunde armatuak indarrez bazterreratu du halakoen okerra. Abuztuan zehar, ETAk bederatzi lehergailu jarri ditu Kantabria, Asturias eta Galizian, lehergailu txikiak eta kalte handirik ez egitera bideratuak. Kurtso politiko erabakigarriaren atarian, ETAk argi utzi du bere jarduera armatuarekin jarraitzeko gai dela, modu horretara esames ugari gezurtatuz; egoera politikoan zein indarrarekin eragiten duen bestelako kontua da, baina eragiten duela eta hor dagoela oso argi geratu da.
Txillardegiren euskarari buruzko lanak liburuan
Euskararen aldeko borrokan du izena Elkar argitaletxeak irailaren 3an aurkeztuko duen liburuak. Lan horretan 50eko hamarkadatik hasi eta 80kora arte Jose Luis Alvarez Enparantza, ‘Txillardegi’k euskarari buruz idatzitako hainbat lan bildu dituzte. Irailaren 29an 75 urte beteko dituenez, liburuaz gain, omenaldia egingo diote irailaren 7tik 9ra. Markos Zapiainek, Emilio Lopez Adanek eta Pilartxo Etxeberriak donostiarraren ibilbide literario-filosofikoa, politikoa eta hizkuntza alorrekoa jorratuko dituzte.
Juan Bautista Merino Urrutiaren omenez
Euskaltzaindiak udako geldialdiaren ondoren, irailaren 9an hasiko du ikasturtea. Hilaren 9tik 11ra artean, Logroñon, Errioxako Juan Bautista Merino Urrutia (1886-1982) euskaltzain ohorezko eta ikerlearen omenez egingo dira jardunaldiak.
Udal euskaltegiak Zarautzen
Irailaren 2an eta 3an, Gipuzkoako 18 euskaltegitako arduradunak elkartuko dira Zarautzen egingo duten mintegian. Arduradunek adierazi dutenez, ikasleen profila aldatzen ari da eta hausnarketa egiteko premia badago. Horretan ahaleginduko dira bi egun horietan..
Esperantoa hizkuntza ofizial izango denaren esperantza
Abuztuaren 25etik 29ra artean 300dik gora esperantista elkartu dira Bilbon Europako VI. Biltzarrean. Jardunaldietan Europako Batasunean esperantoak duen egoera aztertu dute. Hizkuntza unibertsal hau goraipatzen duten jarraitzaileen asmo nagusia esperantoa Europako estatuetan ofiziala bihurtzea da. Biltzarrean bi alor zehatz ere landu dituzte. Batetik, Europako Parlamentuan esperantoa ofizial egitea nahi dute. Apirilean egin zuten Parlamentuan hizkuntza hau erabiltzeari buruzko bozketa eta ezezkoa atera zen. Esperantoaren adituen ustez ordea, Europako Parlamentuan orain 25 estatu biltzen dira eta hizkuntz sorta oso konplexua da. Esperantoa erraza da ikasteko »hiru hilabetean ikasi omen daiteke» eta gainera neutroa da, ez dagokio inolako herrialderi.
Nazioarteko harremanetarako aproposa dela uste dute esperanto zaleek eta bestalde, hezkuntza sisteman integratzea ere nahi dute. Europako Parlemantuak ikastetxeetan esperantoa hautazko ikasgai jar dezala eskatzen dute. Hungariak hala dauka ezarrita duela bederatzi urtez geroztik.
Ikusmira handia kurtso politikoaren hasieran
Hasi da kurtso politiko berri eta entzutetsua. Denetarik entzun daiteke eta indar politikoak tinko ari dira beren era guztietako armak zorrozten. Ibarretxe Planaren ikasturtea izango da eta azaroa bukaera edo abenduaren hasieran ikusiko da bere lehen jauzi serioan Eusko Legebiltzarrean zer gertatzen den, funtsean ea Sozialista Abertzaleek planak aurrera jarraitzea ahalbideratzen duten edo ez. Nazio Eztabaidatik sortutako adarrak ere lanean ari dira eta ikusi beharko da orain arte, herri kontsulta dela eta egindako kontaktu errondan atxiki diren emaitzak onak diren ala ez. Denbora gehiago ere izango dute, dena den, oraingoz herri kontsultari buruzko akordioa lantzeko otsailerako tartea izango dute eta. Datorren astean, halaber, irailaren 12an, Patxi Lopez lehendakarigai ofizial izendatuko du PSE-EEk barrunba handiz. Azaroan, aldiz, Maria San Gil popularrak Carlos Iturgaitz ordezkatuko du EAEko PPren lehendakaritzan.