hainbat herrialdetako folklorea ezagutzeko aukera eskainiko dute asteotan Tuterak eta Portugaletek. Tutera Hiria Dantza Jaialdiak Espainiako Estatuko eta Europa Ekialdeko taldeen lanak hartuko ditu bederatzigarren aldian. Uztailaren 16 eta 17an, Borbelako Arantxa Folklorikoa (Portugal), Barranquillako Unibertsitateko taldea (Kolonbia), Zapovit (Ukraina) Tuterako udal dantza taldeak eta Sevillako San Ildefonso de Mairena udal dantza taldeak, esaterako, eskainiko dituzte emanaldiak. Portugaleteko Folklore Jaialdiak Europako Batasunaren handitzea hartu du aurten ardatz eta horren harira hainbat mahai-inguru antolatu ditu. Uztailaren 22tik abuztuaren 1a arte, Txekia, Eslovenia, Eslovakia, Estonia, Hungaria, Letonia, Lituania, Polonia eta Maltako taldeek kantu eta dantza ikuskizunak plazaratuko dituzte.

Ean (Bizkaia) bizi izan zen Gabriel Aresti, bere bizitzaren azken bi urteetan. Eta ordutik 30 urte iragan direnean, poeta eta euskaltzale handia omendu nahi izan dute eatarrek. Hartara, Eako Udalaren eta HEA kultur taldearen ekimenez eta Gabriel Arestiren Etxea lemapean, ekitaldi mordoa atondu dute datorren uztailaren 24rako. 12etan udal batzar berezia izango da eta bertan Anjel Zelaietak, Jon Kortazarrek, Karmelo Landak eta Txomin Peillenek Arestiren gainean hitz egingo dute. Ondoren, portuaren ondoan haritza landatuko da haren omenez. Arratsaldean Bihotz Bakartien Klubak gidatutako kafe tertulia izango da eta iluntzean Arestiren Etxea ikuskizuna eskainiko dute herritarrek, Galder Perez eta Mikel Martinez aktoreek eta hainbat kantari eta poetek. Kalejira eta agur ekitaldia ez dira faltako.

Zazpi euskal artista gazteren lanak hartuko ditu Gasteizko Arte Garaikide Euskal Zentro-Museoak, eki-behe aretoan, irailaren 12ra arte, Inguru hurbilak programaren baitan. Bi komisario, Virginia Torrente eta Artiumeko Daniel Castillejo, arduratu dira Ibon Arroniz, Nerea de Diego, Aitor Lajarin, Anabel Quincoces, Manu Uranga eta Carlos Hermosillak eta Leire Galagarzak osatzen duten Ideolab kolektiboak egindako lanak paratzeaz. Eskulturak, instalazioak, argazkiak... askotariko lanak topa daitezke bertan. Landutako gaiak ere askotarikoak dira: multinazionalak, publizitatea, alegiazko munduak... Inguru hurbilak programak jarraipena izango du etorkizunean eta bi urtero egingo da.

Urtero bezala, topaketak egiten ari dira Eibarren Euskal Herriko Gazte Orkestrako (EGO) 94 kideak. Carlos Etxeberriaren Antso Handia, errazu, Beethovenen 7. Sinfonia eta Dvoraken Dantza eslaboa prestatzen ari dira eta uztailaren 19tik aurrera Bilbo, Hondarribia, Donostia, Durango eta Gasteizen eskainiko dituzte kontzertuak. Aurtengoan EGO Europatik haratago joango da lehen aldiz; izan ere, abenduaren 22tik urtarrilaren 6ra hamar emanaldi eskainiko ditu Txinan.

Sortzaileak dira izatez gazteak, baina sormena sustatzen ez bada eta sortutakoa zabaltzeko aukera larregirik ez badago, gazte gutxi batzuek egingo dute aurrera. Hori saihestearren eta gazteen izaera sortzailea sustatzea eta kultur jarduerak sortzeko eta zabaltzeko baliabideak eskaintzea xede izanik, Gazte Sortzaile sariak antolatu ditu Topaguneak, asteburuetan.com gazte programaren baitan. Urtero gai ezberdina izango dute sariek eta aurtengoan graffitia da aukeratutako gaia. 15 urtetik gorako gazteek bakarka nahiz taldeka parte hartu ahal izango dute. Horretarako, graffitiaren bozetoa DIN A3 formatuan eta koloreetan bidali beharko dute eta hautatutako lehiakideek, urriaren 2an, Mendaro herriko hainbat paretetan margotuko dituzte lanak. 1.500 euroko lau sari banatuko dira eta egun guztian, graffiti, scratch, DJ, perkusio, Break Dance eta musika tailer eta emanaldiak izango dira. Sormena eten ez dadin.

* * * * * * *

Brasildar eta euskaldunen harremana estutzeko Brasilen bizi izan diren euskaldunek, nolabait «euskaldun» sentitzen diren brasildarrek eta Brasilera joandako euskaldunen seme-alabek egindako ahaleginaren fruitu da uztailaren 16an, Eusko Ikaskuntzak Donostiako Miramar jauregian egingo duen Euskaldunak Brasilen jardunaldia. Hiru hitzaldi izango dira: Estebe Ormazabal biologoak Ba al dago euskaldunik brasilen? eskainiko du; Arantxa Ugartetxeak Euskal--brasildar emozioaren irakurketa pedagokikoa ,eta Edson Goyak Musika Brasildarra. Alfredo Correia Soeira psikiatra eta Brasileko Euskal Pilota Federazioko lehendakariak Errealitate zirraragarria liburua aurkeztuko du. Gainera, capoeira eta musika brasildar emanaldiak izango dira.

Musika Mp3n salgai Metaken webgunean Metak diskoetxeak (www.musikametak.com) webgunea berritu du eta taldeen inguruko informazio andana zintzilikatu du: diskografia, kantuen hitzak, argazkiak, agenda, kontaktuak... Horrez gain, kantuak eta diskoak mp3-n salduko ditu: diskoak 6 eurotan eta kantu bakoitza euro batean.