Gizartea
Ingurumena
Politika
Ekonomia
Kultura
Euskara
Feminismoa
Hezkuntza
Nazioartea
Iritzia
asteazkena 2024ko maiatzaren 01an
Ezpalak
Live in Vitoria
Etorkinen kultura bermatzearren egiten du lan Gasteizko Zunzun kultura arteko taldeak. Geroz eta etorkin gehiago bizi da hirian. Haien kultura eta bizipenak gizarteratzeko asmoz Live in Vitoria disko-liburua kaleratu du Zunzunek. Uruguay, Georgia, Brasil, Kuba... makina bat herrialdetako etorkin musikariek hartu du parte euren kantekin ekimenean. Kanta bana grabatzeaz gain, musikari bakoitzak Gasteizen bizitzea zer den idatzi du eta bere ibilbidearen berri eman du.
Poltsiko antzerkiaren txanda
Donostiako Gros, Antigua, Egia, Herrera, Martutene eta Intxaurrondo auzoetako tabernatan izango dira aurtengo Donostiako XIII. Poltsiko Antzerkiko saioak. Guztira 23 ikuskizun antolatu dituzte eta aurkezten diren lanen artean Ramon Agirre eta Joserra Senperenaren 7 gezur txiki eta Bele Bizi-ren Ke-takoiak lanak eskainiko dituzte euskara hutsean. Donostian bilduko diren hamar taldeek umorea dute beraien lanen ardatz, askotarikoa ordea: absurdoa, kaustikoa, dramatikoa...
Bertsotan Santutxuko Karmelo plazan
Hogeigarrenez egingo dituzte Bilbon Udaberriko Bertso Saioak. Euskaltzaleentzako topagunea izatea eta hiriko bertso eskolek egiten duten lana sustatzea izan da hasieratik ekimenaren helburua eta Santutxuko bertso eskola izan da ekimenaren bultzatzailerik garrantzitsuenetakoa. Arrazoi hori dela medio, orain arte Udaberriko Bertso Saioak hilabete osoan zehar leku ezberdinetan egiten ziren arren, aurten guztiak Santutxuko Karmelo plazan egitea erabaki da. Maiatzaren 29a bitarteko larunbatetan, egungo bertsolaririk onenak biltzea lortu dute antolatzaileek. Besteak beste, Andoni Egaña, Sebastian Lizaso, Maialen Lujanbio, Igor Elortza, Unai Iturriaga eta Jon Lopategi arituko dira.
Ganbera musika Azkoitia eta Oñatin
Azkoitiko Santa Kruz komentuan eta Oñatiko Santa Ana antzokian izango dira Azkoitiko XIII. Udaberriko Musikaldiko eta Oñatiko XXVI. Musikegunak-eko kontzertuak. Maiatzaren 15eko, 22ko eta 29ko Azkoitiko kontzertuetan, Iturriaga Laukotea, Utopia Orkestra, eta Almudena Ortegak eta Josu Okiñenak osaturiko bikotea arituko dira. Oñatin, maiatzaren 16an, Xabier Lizaso pianistari esker, Aita Donostiaren, Johan Straussen eta beste hainbaten lanak entzun ahal izango dira. Maiatzaren 23ko eta hilabeteko azken igandeko saioetan Utopia Orkestra eta Pandora bikotea arituko dira.
Gerra eta literatura hizpide
BBK-k (Bihotz Bakartien Kluba) antolatuta, Gerra eta Literatura Euskal Herrian jardunaldiak egingo dituzte Larrabetzuko Anguleri kultur etxean maiatzaren 26a bitartean. Gerra gaitzat hartuta, Euskal Herrian sortu diren literatura lanak aztertzeaz gain, erbesteratuak izan zirenen bizipenak ezagutzeko aukera izango da ekitaldi horietan. Maiatzaren 5ean gerra argazkiez hitz egingo du Edorta Jimenezek; 13an Tiburtzio Ispizuaren gainean arituko dira; 19an gerrari buruz diharduen XX. mendeko euskal poesia izango du hizpide Jon Benitok, eta 26an Markos Zapiainek gerra ardatz duten Kilkerren hotsak, Kolosala izango da eta Soinujolearen semea liburuen gainean jardungo du.
Manex Goihenetxe hil da
Manex Goihenetxe elur jauzi batek harrapatuta hil da, Pic du Biscau mendian, Biarnon. Ezterenzubin (Nafarroa Beherea) 1942ko irailaren 22an jaioa, Historia eta Irakasle ikasketak egin zituen. Lan eskerga egindakoa dugu Goihenetxe: UEUko sortzaile eta bertako lehen idazkari nagusi izandakoa, EHAS alderdi abertzalearen sortzaileetakoa, Baionako Fakultatean irakaslea, Baionako Etxepare lizeoko zuzendari eta irakaslea... Historialari gisa zen ezaguna batez ere. Bi tesi zituen eginak: Nafarroa Behereko instituzioez bata eta Euskal Herriko historiografiaz bestea. Komunikabide ugaritan argitaratu zituen idazlanak. Historia liburu andana idatzi zuen, baina guztietatik Euskal Herriko Historia da ezagunena. Lan horren bosgarren alea ekainean zuen argitaratzekoa.
Kulturaren 21 Agenda
Joan den astean Interaccio jardunaldiak egin ziren Bartzelonan, Bartzelonako Diputazioaren eskutik. Eremu lokalean beharrean ari diren politikari eta kultura kudeatzaileen hausnarketa gune izan nahi duen honek egungo politika kulturalak aztertu zituen. Izan ere, globalizazioaren aurrean ahulak dira aipatu politikak. Jardunaldietan Kulturarentzako 21 Agenda aztertu zuten »Garapen Iraunkorraren 21 Agenda oinarri hartuta, mundu osoko hainbat eragile bultzatzen ari direna». Kultura kudeatzeko eredu iraunkorra lortzeko, sormena, kulturaren aniztasuna eta zabaltasuna eta herritarren bizitzan kulturaren parte hartzea bultzatzeko akordioen beharra nabarmendu zuten.
Artearen begirada indarkeria politikoari
Gasteizko Arte Garaikideko Euskal Zentro-Museoak (Artium) indarkeria politikoaren gaineko erakusketa zabaldu du: Laocoonte Irentsia. Artea eta indarkeria politikoa. Erakusketaren komisario eta Museoko zuzendari Javier Gonzalez de Duranak azaldu duenez, indarkeria politikoaren inguruko beharrezko eztabaida demokratizatzea da erakusketaren helburua. Ia berrogei artistaren lanak bildu dituzte horretarako: Bill Viola, Francisco de Goya, Txomin Badiola, Esther Ferrer... Horrekin batera, hitzaldi eta pelikula andana eskainiko ditu museoak.
Irakurrienak
Matomo erabiliz
#1
Gorka Bereziartua
#2
Mikel Garcia Idiakez
#3
Gorka Peñagarikano Goikoetxea
#5
Gorka Peñagarikano Goikoetxea
Azkenak
2024-04-30
ARGIA
Netanyahuk dio Rafah inbadituko dutela su-eten akordioa "egon zein ez egon”
34.000 palestinar baino gehiago hil ditu Israelek urriaren 7az geroztik Palestinan, eta beste milaka dira desagerturik edota larri kolpaturik. Jarraipena egiten ari gara.
2024-04-30
Zigor Olabarria Oleaga
Netanyahuk dio Rafah inbadituko dutela su-eten akordioa "egon zein ez egon”
Israelek 40 eguneko su-etena eta preso trukea eskaini dio Gazari, baina akordioa lortu edo ez Rafah inbadituko dutela adierazi du Netanyahu lehen ministroak. AEBk eta Erresuma Batuak Hamas presionatzen ari dira Israelen eskaintza onar dezan. Astelehenean 47 palestinar hil zituen... [+]
Hil egin da Artzentalesen zauritu zen basogintzako langilea
Langilea larri zauritu zen apirilaren 24an, eta astelehenean, hilak 29, hil da. 22 urte zituen eta sektorean bi hilabete soilik zeramatzan lanean. 2024 urtean hildako 22. langilea da.
2024-04-30
ARGIA
Eneko Bidegainen 'Bichta éder' eleberriak jaso du 111 Akademiaren Saria
Karmele Jaioren Maitasun kapitala-rekin lehiatu da finalean. 2023ko “libururik gogokoen” izendatu dute Bidegainen “bihurgune askotako” thriller politikoa 111 Akademia osatzen duten literaturazaleek.
Eguneraketa berriak daude