Teknologi kontsumoa neurtzeko TDK enpresak Europan egin berri duen inkestaren arabera, osagarri teknologikoek nahiko mendean hartuta gauzkate. Uharte bakarti batera zer eramango ote luketen galdetzean, europar gehienek aski erraz botatzen omen dugu erantzuna: «telefono mugikorra eta PCa».
Alemania, Espainia, Frantzia, Italia, Polonia eta Erresuma Batuan egin den galdeketak argitzen duenez, parte hartzaileen %46ak ezingo luke PCrik gabe bizi eta %42ak telefono mugikorra ipintzen du ezeren gainetik. Esan beharra dago Espainian, gainerakoetan ez bezala, zertxobait aldatzen direla datuak, PCrik gabe moldatuko ez liratekeenak %25 baitira.
Osagarri teknologiko gogokoenak aipatzen hasita, diferentzia handiz gailentzen dena telefono mugikorra dugu (%93) eta ondoren CD irakurgailua eta PCa datoz.
Osagarri teknologiko desiratuenen artean, berriz, argazki kamera digitalak aipatzen dira besteen gainetik, galdeketan esku hartu duten %27k datorren urtean erosteko asmoa duela azaldu dute.
Eta ondoren datorrenak inkestaren emaitzekin zerikusirik ez badu ere, badu lotura zuzenik telefono mugikorren erabilgarritasunarekin. CNR gaztelaniazko aldizkarian irakurri berri dugunez, Malaysian aski da SMS mezu labur bat idatzi eta bikotekideari hiru aldiz bidaltzea dibortzioa martxan jartzeko. Nahikoa omen da, hain justu, "zutaz dibortziatzera noa" edo antzeko oharra eskaera legala izan dadin. Antza denez, metodo hau beste hainbat herri islamiarretan izan duen arrakastagatik onartu du Malaysiako gobernuak. Badu, ordea, eragozpen txundigarririk... Gizonezkoentzat bakarrik balio du.

Wollemi du izena pinu berezi honek eta Australiako basozain batek 1994an tupustean aurkitu zuen arte, 175 milioi urteko fosil baten berri besterik ez zen. Hainbat urte iraun duen ikerketaren ondorioz eta aldaxkak landuz, zientzialariek pinua berpiztea lortu dute eta 2005. urtean zenbait mintegitan salgai izango dela iragarri dute.

Global carbon project ziklo karbonikoaren politika eta aldaketa klimatikoa aztertzen duen nazioarteko zientzia erakundeak adierazi berri duenez, 50-75 urte barru basoek ezingo dute gaurko CO2 maila xurgatu eta klimaren aldaketa areagotu egingo da. Basoek karbono dioxidoaren herena xurgatzen dute, ozeanoek beste heren bat eta gainerakoa atmosferan pilatzen da. Azken hau dugu, hain zuzen, azken urteotan horren entzutetsu bilakatu den aldaketa klimatikoaren erantzule nagusia.
Aipatu erakundearen azterketaren arabera, lurreko landarediak horrenbeste karbono dioxido xurgatu badu, azken urteetan berriztatu egin delako eta "gaztea delako" izan da, baina landareok heldutasunera iritsi eta gehiago hazten ez direnean, orain arteko kopuruak ezingo dira mantendu eta uste baino gas gehiago pilatuko da atmosferan.