Motzean idazteko


2003ko urriaren 05an
Hedatua dago, batik bat gaztetxoen artean, mezu laburretan erdal hitzak laburbiltzeko ohitura. Euskaraz, ordea, usadioa ez dugu geure egin. Zein aurpegi jarriko zenuke «HNDN :-*» mezua jasoko bazenu zure segapotoan? Ez da errakuntza, ezta hizkuntza arraro bat ere, mugikorretan erabili ohi den grafiaz baliaturik euskaraz idatzitako mezua baizik, «hitz egin nahi al duzu nirekin? muxutxo bat» dioena. Esparru honetan euskal hizkuntzak duen hutsunea bete nahian, grafia hori lantzen duen liburuxka da kaleratu berri dena.

Argitalpena sortzeko ideiak Kilometroak festan du jatorria. Urriaren 5ean Lazkaon egingo den ikastolen aldeko festak teknologia berrien erronka bere egin du. San Benito ikastolako ikasleen eskariari erantzuna emanez sortu dute Zazpiak Batman taldeko Kike Amonarriz, Asisko Urmeneta eta Antton Olariagak mezu laburrak idazteko "Segapotoen Mezu Sekretuak" liburuxka. Guztira, 50.000 ale argitaratu dira.

Segapotoetako grafia oinarritzat hartuta, Unai Iturriagak "Euskrz 2zi ny dt" logo iraultzailea sortu du aurtengo Kilometroetarako. Lelo horretan oinarriturik, gazteek mezu laburrak euskaraz lantzeko dituzten zailtasunak aztertu ditu Zazpiak Batman kolektiboak. Kutsu umoretsuaz baliatu eta ikasleen ekarpenekin osatu dute araurik gabeko "Segapotoen Mezu Sekretuak" hiztegia. Besteak beste, hitz solteak, akronimoak, emotikonoak, iruditzak eta esaldiak aurki ditzakegu bertan. Kike Amonarrizen hitzetan, "liburuxka hau probokazio bat da. Guk ez dugu espresuki gure hiztegitxoan agertzen diren hitzak erabiltzea nahi, gure helburua segapotoetan euskara erabiltzeko zirikatzea da, hau da, zibereuskararen abiapuntua jorratzea". Euskarak alor honetan duen hutsuneari dagokionez, zera adierazi du Asisko Urmenetak: "Epizentroa geu gara: hiztunok. Kanpora jo dezakegu adierazkortasun eske, jakina baietz, eta esamoldeak guretu. Gakoa, beti ere, geuk behar dugu eskuan, eta ez bestek. Eta mezuak funtzionatzen badu, balekoa da. Arazoa esklusibitatea da: sistematikoki espainolera jotzen baitugu Hegoaldekook, eta frantsesera Iparraldekook. Eta guk dakigula, bada besterik bazterretan. Euskalkia izan, asmatua izan, mailegua izan, gure arteko aduanak pasatuz gero, elkarren arteko komunikazioa ahalbidetzea».

Filosofia honakoa da: ulertzen den guztia balekoa da. Zertarako "h"ak, bokalak eta esaldi konposatuak? Helburua 160 karaktereko espazioan ahalik eta gauza gehien kontatzea da. Horretarako, euskara batua eta euskalkiak, denak dira baliagarriak, hitz egiten dugun bezala idaztea da gakoa. Azken finean, gutxiago gastatuz ongi pasatzeko proposamena egiten du Zazpiak Batman taldeak.

A zer nolako askatasuna ikastolan erakutsi dizkiguten eta buruan gordetzea hainbeste kostatzen den ortografia eta idazkera arau horiek ez erabili beharrak ematen diguna! Eta batik bat... a zer nolako poza gure idazketa akatsez inork barrerik egingo ez duela jakinda! Akaso ez al dute, bada, irakasleek beti laburbiltzeko gaitasun hori bultzatu nahi izaten? Aukera paregabea alajaina! Hitzen hasierako hizkiak hartu eta hitz laburrago ezinak sortu, puntuazio markekin irudiak osatu, tarteak ezabatu, hitz berriak asmatu... Irudimena lantzeko modu bitxia, alegia! Erreportaje hau sinatzen duenari ere bururatu zaio komunikabide hau irudika dezakeen zeinua: izartxoa (*). Akaso izarra ez al da argitasuna islatzen duen zeinua? Irizkiderik bai?

2dl zr mzu skrtua!!

Liburuxka zibereuskara sortzeko ilusioaren emaitza da. Begiratu bat eman ostean zer edo zer bururatu dakioke edonori, eta hain zuzen ere, ekarpen horiek bildu nahian, proposamenak bidaltzeko deia egin du Zazpiak Batman taldeak. Halaber, asmakuntza propioak, noizbait jaso edo inon irakurritakoak bidali eta lehiaketa batean parte hartzeko modua izango da www.argia.eus/mantxut web gunean. Abenduaren 1a baino lehen jasotako proposamen guztien artean "Mantxut" lokuzioen 5 bilduma, KMK'03ren 5 kamiseta eta Zazpiak Batman kolektiboaren 5 kamiseta zozketatuko dira.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude