Gehienek sinistu dute Herrizaingo Sailak Herrerako gertakizun odoltsuei buruz emandako ikuspuntua, eta gutxik eskatu dute gertatutakoa guztiz argitzea. Javier Balzaren sailaren esanetan, ETAko komando bat bi ertzain hiltzen saiatu zen gezurrezko istripu bat sorostera joan zirenean; etakideek eraso egin zuten eta ertzainek erantzun; etakideek ihesari ekin zioten, baina bat ihesean hil zen izterrean jasotako tiroaren ondorioz, atentatuaren lekutik gertu. Horra hor gauza askotan sinesgarria izan daitekeena, ETAk egindako beste atentatu batzuetan ere erabili izan baititu nolabaiteko aitzakiak Segurtasun Indarrak hurbilarazteko. Ilunak enfrentamendu armatuaren ondoren datoz nagusiki, entzun eta irakurri ahal izan denez, eta ondo ulertzen ez dena da, nola ez zuten topatu Arkaitz Otazua lehenago hau atentatu lekutik gertu egon da, areago odol arrastoa izanda.

Elkarrik adierazia zuen 10.000tik gora firma lortuz gero 2004ko udaberritik aurrera beste Bake Konferentzia bat bultzatuko lukeela eta hala egingo duela iragarri du. Tartean ekimen ugari bultzatuko du, horietako bat Konstituzioak babesten duen Eskaera Eskubidea; honen bidez, biolentzia eza, kontsentsua eta irtenbideak bilatzea oinarrian izango dituen elkarrizketa prozesua aldarrikatuko du eta beharrezkoa den firma bilketa bideratuko du. 2001 eta 2003a artean ere Elkarrik Bake Konferentzia bat atera zuen aurrera.

Hizkuntzaren transmisioa gauzatzearren, eskolaz kanpoko jardueretan eta guraso-umeen arteko komunikazioan euskara erabiltzearen garrantzia azpimarratu dute azken urteetan adituek. Horri jarraiki, hazten ari dira elkarte eta udalek horren harira abiatutako ekimenak. Horietako bat Leioako Udalak sortutako «Olgetan" programa da. Urritik ekainera eta astelehenetik ostiralera, jolasak eta tailerrak egingo dituzte haurrentzat eta gurasoentzako ikastaroak antolatuko. Arrigorriaga, Basauri, Berango, Erandio, Getxo eta Leioako Udalek bestalde, «Txikiakaz nagusi" proiektua aurkeztu dute. Urrian hasiko da eta mementoz, bi ibilaldi prestatu dituzte familientzat. Buruntzaldeko sei herrik ere, Astigarraga, Hernani, Lasarte-Oria, Urnieta eta Usurbilek, bi egitasmo prestatu dituzte helburu berarekin. "Etxetik hasi behar delako" izenekoak euskararen transmisioan familiak duen garrantziaz gurasoak jabeteza du helburu eta horretarako liburuxka bat banatuko zaie gurasoei; bestea euskarazko aisialdiaren berri ematen duen "Buruntzaldeko aisiako gida" argitaratzea izan da.