Dantza disziplina desberdinek hartuko dute Miarritze irailaren 6an hasi eta bi astez luzatuko den Maitaldia jaialdiaren baitan. 13. edizioak irekiera ekitaldi handia izango du aurtengoan. Izan ere, Lucia Lacarra dantzariak hartuko du parte ekitaldi horretan English National Balletarekin batera. Eta horrez gain, gizonezkoz osatutako Grandiva baleta ariko da irekiera ekitaldi horretan. Aurtengo Maitaldiaren egitarauan dantza garaikideko hiru lan aurkeztuko dira bestalde: Pantxika Telleriaren Elirale konpainiak, Suitzako Philippe Saire taldeak eta Preljocaj Ballet ezagunak euren lanak eskainiko dituzte. Dantza ikuskizunei gehitu behar zaie gainera egun horietan eskainiko diren hitzaldiak, erakusketa eta emango diren ikastaroak.

Bestela honezkero galduta egongo litzatekeen lan ugari bildu du Auspoa bildumak 1961ean sortu zenetik. Batez ere, bertsolaritza klasikoaren alorrean, balio handikoa da Antonio Zabalak eginiko lana bildumaren osaketan. Sendoa argitaletxea arduratu da bildumako liburuak argitaratzeaz gaurdaino, baina aurrerantzean ez dio eginkizun horri jarraituko. Izan ere, duten balioa ukatu gabe, bildumako liburuak ez dira errentagarriak. Hori dela eta, Gipuzkoako Foru Aldundia arduratuko da aurrerantzean, Koldo Mitxelena Kulturunearen bitartez, Auspoa bildumari jarraipena emateaz, okerrik ez bada behintzat. Hilabete batzuen buruan sinatuko da akordioa, hori horrela izan dadin.

Etxean ikasten zen garai batean instrumentu bat jotzen edo dantza egiten. Egun ordea, irakaskuntzaren bidez egiten da transmisioa. Hori dela eta BilbaoMusikak Ikasfolk izeneko egitasmoa jarri du martxan datorren ikasturterako. Musika eta dantza tradizionala musika eta dantza ikasten edo irakasten dabiltzanei erakusteko xedea du Ikasfolkek. Horretarako, ikastaroak, mintegiak, lantegiak eta hitzaldiak prestatu dituzte. Irakasle ezagunak aukeratu dituzte. Besteak beste, Juan Antonio Urbeltz, Kepa Junkera, Joseba Tapia, Ibon Koteron, Juan Mari Beltran edota Oreka TXeko txalapartariak izango dira irakasleak. Guztira 17 gai prestatu dituzte, hala nola, Bizkaiko dantzak, perkusio tradizionalean espezializatzeko ikastaroa, biolina musika tradizionalean edota Bizkaiko kopla zaharren ezaugarriak.

Emakumeek beste emakumeei ateratako argazkiak bildu ditu «Andreen begiradak, andreen begiradapean» izeneko erakusketan Bilboko BBK aretoak. XIX. mendetik 2002. urtera arte 68 argazkilarik egindako lanak daude ikusgai. Hogei herrialdetako emakumeen irudien artean, erretratuak, autoerretratuak, biluziak, laneko eszenak... ageri dira. Gehienak zuri beltzean. Besteak beste, Fabiana de Barros, Christine Spengler edota Anne Noggleren argazkiak bildu dira erakusketarako.

Surfa kirola dela garbi dugu guztiok. Ez hain garbi agian, surfa zine ere bihur daitekeela. Izan ere, gure artean horrela ez bada ere, Estatu Batuetan edo Australian, 50eko hamarkadan hasi zen surfari eskainitako zinema lantzen. Gurean ordea, ez da horrelakorik gertatu. Honi aurre eginez eta genero honetako klasikoak berreskuratu nahian, hain zuen, irailaren 11, 12 eta 13an Donostiako Aquariumeko auditorioan lehenengo aldiz Donostiako Surfilm Festibal jaialdia egingo da. Genero honi eskainitako lehenengo jaialdia da Espainian, eta bakarrenetakoa Europan. Antolatzaileek diotenez, kirolaren alderdi komertziala alde batera utzita, kalitatea, natura eta olatuaren aurkikuntzaren magia gailenduko dira egun horietan eskainiko diren filmetan.

Jabier Merkader artista gasteiztarrak orain urtebete Arrasaten sortu zuen zeramikari buruzko aldizkari digitala bakarra da Espainian, eta Europan hirugarrena. Berriki aurkeztu du Merkaderrek komunikabide digitala Zaragozako zeramika garaikideko azokan. Ceramikarte.com-ek ikastaroen, bigarren eskuko azoken edota mundu osoko merkatuen berri ematen du. Mundu osoko erabiltzaileak ditu gainera. Hain zuzen, komunikabide digitalaren beste helburuetako bat horixe da: mundu osoko zeramikarien arteko harremanak sendotzea eta bide batez, zeramika garaikidea ezagutaraztea.

Hori da iaz Donostian egin zen Electrogaia Jaialdira hurbildu zen pertsona kopurua. Antolatzaileek Espainia eta Frantzian Jaialdiak lortu duen ospea nabarmendu dute, aurtengo abuztuan burutuko den zortzigarren edizioari begira. Aurten gainera, zortzi egunetara zabaldu dute: hilaren 9tik 16ra egingo da Igeldoko Ku diskotekan. Eta egunero dj ezberdinak izango dira.

Eta pertsonaia gaizto ikusgarririk gabekoak plazaratu ohi ditu Bilboko Astiberri argitaletxeak orain bi urte eta erdi sortu zenetik. Egindakoaren saria iritsi zaio orain, izan ere, komiki argitaletxe onenari urtero ematen zaion Diario de Avisos saria eskuratu du. Orain artean, Planeta edo Norma bezalako argitaletxe handiek jaso dute sari hau.