0rlegia, horixe da ekologismoaren kolorea. Hori, Alemaniako 80ko hamarkadaren hauteskunde zerrenda koloreanitzetatik heredentzia dugu eta handik ere datozkigu ekologistak eta partidu berdeen arteko loturak eta nahaste-borrasteak.

Argi gera bedi mundu honetan elkarte, ekimen zein talde ekologista ugari daudela, kontserbazionismotik ekologia sakonera arte, baina partidu berdeak beste gauza bat dira, gobernu edo beste instituzio politikoetan aritzeko. Beraz hauek alderdiak eta besteak gizarte mugimenduak, bakoitza bere leku eta jardueran.

Sasoi elektoralean garenez berdea da partidu guztiek aireatu behar duten margoa, iritzi publikoak kezka handia baitauka ingurumen arazoekin, bertokoak edota globalak. Publikoa horri begira badago noski, hortik botoak atera daitezke.
Ezker Batua da bakarra, "Berdeak" partiduarekin aliaturik agertzen dena nahiz eta partidu txiki hori aspalditik hauteskunde erakusleiho baino gehiagorik ez izan. Zeozer birtuala kanpainetan birjaiotzen dena.

Berdeak Iparraldean beste kontu bat dira eta Europako beste alderdi berdeen antzera botoen % 5 eta 10aren arteko kopurua lortzen dute.

Berde hauek aparte utzita, alderdi guztien gogoa da berde baino berdeago agertzea eta hor dabiltza ukondoka ea nor den berdeena. Bizkaiko Foru Aldundirako EAJren kartelean ikus daiteke partidu honek daukan mezu ekologikoa. Semaforoen koloreetan leloak paratuz, argi berdea eta bizikletaren ikurra erabiltzen dute "Bilboko Hegoaldeko Saihesbidea" saltzeko. Ezin nuen sinistu nola atera daitekeen txirringa bat mugikortasun motorizatua bultzatzeko. Lagun batek argitu zidan kontua. SuperSur hortatik kamioiak eta kotxeak joanik, Bilbon toki gehiago bizikletentzat. Ikusteko dauzkagu oraindik politikarien aldetik trikimailu eta iruzurrak. Jeltzaleen arteko "primariak" irabazi eta gero Aldundirako kandidatuak prentsan esan zuen lehenengo gauzaz ere oroitzen naiz: "Ez dut gura porlanez beteriko Bizkaia, baizik eta herritarren nahien eta beharren araberakoa". Excusatio non petita...

Berdeak ere Bilboko PPkoak. "Zer egingo dute politikariek zaramarekin" lelopean Alde Zaharreko Ekoetxera hurbildu ziren joan den astean beste partiduen ordezkariekin batera, ezker abertzalekoak barne eta EAJ-EAkoen falta nabarian, eta han salatu zuten Zabalgarbiren proiektuan "Ingurumen Konplexu Politiko-Enpresariala" ukiezina eta ahalguztiduna dagoela. Halaxe esan ziguten eta gu sinistu ezinean ginen. Nor ari zen berbetan PPko zinegotzi bat ala ezkertiar porrokatu bat? Batek erantzun zion moduan, sare kontrolagaitz horrek ez du bakarrik zaramen alorrean jarduten baizik eta azpiegitura, energia, garraio eta bestelako negozioetan ere. Berdeak, nola ez, gero eta gehiago Iberdrola eta Sener, Eroski eta BBVA, BBK eta MCC, berdea baita gehien saltzen duen kolorea. Baina azaleko berdearen azpitik hazka egiten badugu diruaren gris metalikoa baino ez dugu topatzen. Sosaren margo hotza.

Berdearen tonu guztiak ditugu gure lur honetan. Euskal politikagintzan eta merkatuan ere bai. Horregatik eta badaezpada ere, nahiago dut azalaren berdearen azpitik gorria topatzea. Sandiaren antzera.