160 orrialde
7,60 euro

Hasier Etxeberriak idatzitako "Inesaren balada" nobela finalista gertatu da 2002ko Apirila sarian, gazteentzako narratiba bultzatu asmoz Corte Inglesek eta Argitaletxe Elkartuak (argitaletxe valentziarrak, galiziarrak, katalanak, asturiarrak, aragoiarrak eta euskaldunak osatzen duten elkarlanerako plataformak) urtero antolatzen duten literatur lehiaketan. Abenturazko nobela dugu "Inesaren balada", XVIII. mendeko kortsario lapurtarren mundura garamatzan idazlana. Bere protagonista nagusia neskato bat da, Inesa Indazubikoa. Zazpi ahizpen artean zazpigarrena jaiotzea egokitu zitzaion neskato honi, eta mendikoa zenez, jakina zen bere patua: sorgina izatea zegokion. Baina bera hegazti urruti-gose bat zen, eta ez zegoen horretarako prest. Bere gurasoen ostatuan lanean ari zela Pellot kapitain kortsarioa ezagutu zuenean, garbi izan zuen zer egin. Pellot kapitainak eta bere tripulazioak soldadu espainiarrak zeuzkaten atzetik, eta haiek ostatuan agertu orduko, ospa egin zuten handik. Inesak, bere aldetik, epe bat jarri zion bere buruari: hamar urte beteko zituen egunean alde egingo zuen gurasoen etxetik eta Pellot kapitainaren bila hasi.

36 orrialde
4,15 euro

Hona hemen Joxean Muñoz eta Inazio Mujikak idatzi eta Jose Angel Lopetegik marraztutako "Karramarro uhartea"ren jarraia: Dimitri kapitaina, Txin-txin pilotua, O'Clock artilleroa, Jozé lemazaina, Pizzicatto sukaldaria, Ton-ton zelataria, ontziko txokoa den Akeita, Iks loroa eta Sam katuari gertatzen zaizkien abenturekin gozatzeko parada berri bat. Gutxienez beste bi liburuxka badaude jada plazaratuak. "Perla Zuria" horietatik bat dugu. Perla Zuria uharte bat da, eta piratek eraikitako antzoki eder bat dago bertan. Garai batean bazen han kanta, dantza eta festa ugari, baina Walkertar Walker eta bere esklabozaleak azaldu zirenetik, akabo jai giroa, eta antzokia erdi erorian egon da. Baina hara nondik pirata guztiak elkartu diren berriro han!

95 orrialde

Gure herriaren joan-etorri luzean, eta eskolak sortu arte bederen, norberaren etxean ikasi ohi ziren ikasi beharrekoak, belaunaldiz belaunaldi jakinarazten ziren sinesteenak batik bat. Eta gaur egun eskola ederrez beterik baldin badaukagu gure herria ere, aukerak aukera, gaztetxoen hezkuntza integralerako guna etxea beti izango dela oinarritzat harturik osatu du Juan Manuel Etxebarriak "Etxea ipuin eskola" liburua, non euskal mitologiako hiru ipuin jasotzen diren: Mari, Laminak eta Olentzero, Jesse marrazkilariak egindako irudiez hornituak eskainiz. Ipuinok euskaraz datoz, baina bakoitzak bere itzulpen-laburpena du, euskararik erabiltzen ez dutenen lagungarri.

31 orrialde
3,61 euro

Donostia Hiriko Kutxa Literatur sarietan Gaztelerazko Ipuinarena eskuratu zuen iaz Francisco M. López Serranok "Sabor de Malta" izenburua duen narrazio honexekin. Oliver Best rock abeslaria, beti mozkorturik dagoen gizona, da kontakizun honen protagonista. Dagoeneko zeharo usteldu zaio gibela Oliver Besti, harrapatu dituen zirrosi eta hepatitisa gaiztoak oso aurreratu zaizkio, eta heriotzara eramango duen azken kopa horren atzetik dabil ero moduan, Maltako ihauteri egunetan prezeski. Baina haren gorabehera horien guztien berri, narratzaile guztiz orojakile batek ematen digu: Jainkoak, alajaina! Zeruaren, munduaren eta gauza guztien sortzaileak, eta beraz, ustekoa da mozkor horren Infernuaren sortzaile ere izango denak.

CD-ROMa
27,50 euro

Elhuyarrek plazaratu duen "Piratekin matematikaren munduan 2" hauxe zortzi-hamar urteko haurrei zuzendua dago. CD-ROM hau berdin erabil daiteke PC edota Macintosh ordenagailuetan. Bertan, batik bat irakasleei eta hezkuntza-esparruan "Piratekin munduan" programa multzoko "Matematika 2" hauxe erabili nahi dutenei oso lagungarri gerta dakiekeen gida didaktikoa aurkitzen da. Menu nagusian, berriz, portuan agertuko dira nabigatzen hasteko behar dituzun guztiak. "Zatoz gurekin itsaso zabalera!", gonbidatuko zaitu piratetako batek, eta animatzen bazara, era guztietako abenturak bizi ahal izango dituzu haiekin batera, mundua zeharkatzen duzuen bitartean. Kortsarioekin ibiliko zara borrokan, merkatura joango zara, zubi bat eraiki...

29 orrialde
4,75 euro

Etxeko txikienak oso kontuan dituen kontakizun bilduma hau Ricardo Alcántarak sortu, Gustik marraztu eta Iñaki Zubeldiak euskaratua da. "Tento eta katea" deritzanean, txakurtxoak kateaz lotutako txakur dotore batekin egiten du topo, eta hura bezain guapoa egoteko gogoa sortzen zaio. Gainera, jakin badaki bere lagunetatik inork ez daukala katerik! Beraz, arin-arin abiatzen da bere gelarantz, jostailu artean kateren bat izan behar duelakoan. Baina han ez du inongo katerik aurkitzen, eta trastelekura doa begiratzera. Eta trasteen artean, kate bat aurkitzen du. Kate luze samarra, kandadu eta guzti duena. Hark balioko dio. Lorategira joan, eta katearen mutur bat bere lepokoari lotu, eta beste muturrarekin zuhaitz baten enborra inguratzen du.

264 orrialde

Eusko Ikaskuntzak, urtero egiten duen bezala, 2001. urtean egin duen lanaren ikuspegi orokorra eskaintzen du "Memoria 2001" deritzan argitalpen honetan, iazko ekitaldian zehar garatu dituen era guztietako jardueren berri xeheki emanaz. Laburbilduz esan dezakegu 2001ean Eusko Ikaskuntzak 25 jardunaldi, mintegi eta sinposio antolatu zituela Euskal Herriko geografia osoan zehar, zientzia ikerketa, hizkuntzalaritza, historia, egungo musika, haurren osasuna, kazetaritza, abeltzaintza, Europaren eraketa, emigrazioa eta diaspora, sareko lana, gizarte mugimenduak eta beste gaiak aztertuz. Horrez gain, 30 liburu argitaratu zituen, ikerketa eta prestakuntza laguntzeko 69 beka eman, eta hezkuntza jarduera zabala burutu zuen.