Euskal Kultur Erakundeak 2001ean egindako lanaren balantze baikorra egin du berriki Biltzar Nagusian. Udal, elkarte eta administrazioekin euskara gizarteratzeko ekimenak jorratzeko asmoa adierazi dute 2002 urteari begira. Orobat, Toponimia biltzeko jardunarekin jarraituko du eta euskara hiriguneetan garatzeko ahalegina egingo du.

XX. mendeko euskara jasotzen duen corpus estatistikoa osatu du UZEIk. Ia bost milioi hitz ditu eta XX. mendeko euskal argitalpenen inbentario osoa du oinarri. Joan den mendean erabilitako euskararen lekuko eta erakusgarri izan nahi du. Corpusa euskara gaurkotzeko tresna garrantzitsua izango da eta ez dauka hizkuntza eredurik proposatzeko asmorik. www.euskaracorpusa.net-en kontsulta daiteke15 urtetan egindako lana.

Orioko eta Getariako Udalek Udalerri Euskaldunen Mankomunitatean (UEMA) sartzea erabaki dute, EAJ, EA eta Batasunaren botoekin. Hala, hemendik aurrera 47 izango dira UEMAko herri kideak. UEMAn sartzea erabaki dute aipatu bi udalek; alabaina, ofizialki ekainaren 9an, UEMA Egunean, izango dira onartuak. Mankomunitateko koordinatzaile Iñaki Arregik emandako datuen arabera, UEMAko kide diren 47 herrietan 90.000 biztanle bizi dira. UEMAren helburu nagusia herri euskaldunetako biztanleak euskaraz bizi daitezen laguntzea da.

.

Pasa den martxoaren 12tik mobilizazio ugari ari da egiten Euskal Herrian Euskaraz. Herritar guztien hizkuntz eskubideak bermatu daitezen antolatu ditu EHE-k mobilizazioak. Hilaren 22 eta 23an herri eta auzoetan mobilizazio egunak izango dira «Hizkuntza eskubideen alde borrokatuz, ofizialtasuna eskuratu» lelopean.