Iparraldeko bertsu liga


2002ko martxoaren 17an
Bakarkako gaia jarri didate: "Bertsu Liga. Iparraldeko bertsu ligari buruz iritzia eman". Neurri eta doinu librean jarduten utziko zidatela uste nuen. "Hiru zortziko txiki bota eta aski", pentsatu dut orduan. Baina baita zera ere! Neurri luzea erabiltzeko agindu didate. Neurri luzeak modan daude nonbait bakarkakoetan, eta hauei ere horiek gustatzen. Berriz ere: "Bertsu Liga. Iparraldeko bertsu ligari buruz iritzia eman". Entzun dut. Baietz esan diot. Ez dut oraindik ikasi gai-jartzaileei ezetz esaten.

Burua itzulika hasi zait. Eskuak sakelan sartu ditut, zerbaiten bila bezala, baina ez dut deus aurkitu. Buruan dudanarekin egin beharko dut. Zer erremedio. Begiak lurrera bota ditut, eta pentsatzeari ekin diot: "Iparraldeko bertsu liga. To! Harrapa ezak! Eta nik baietz esan. Hiru bertso bota behar. Neurri luzean, nola ez. Hiru habanera bota beharko ditiat. Etorri ahala bota, bestetan bezala. Hasiko nauk? Ez, oraindik ez. Goaita. Iparraldeko bertsu liga garrantzitsua duk guretzat. Ez duk komeni zernahi erraten hastea. Tira bada, pentsatu egingo diat. Zergatik duk hain garrantzitsua bertsu liga? Nik dakidala, lehen aldia duk Iparralde osoko bertsu txapelketa bat antolatu dena. Zaharrek, gazteek, denek batera kantatu diagu. Denek batera, denak elkarrekin. Poztekoa duk. Bai, eta hor bazegok lehen bertsoa osatzeko adina mami. Bigarrena orain. Zer erran? Ea bada... Bertsu liga Iparraldeko Bertsularien Lagunak elkartearen proiektu bat duk. Bereziki pertsona batzuei esker aitzina atera dena. Bazaukaat zeri, eta zeini kantatua. Elkartea, elkartekoen lana... Horra bigarren bertsuaren osagaiak. Ez duk puntakoa izanen, baina tira, lehenak bultza, hirugarrenak tira, tartean, hor geldituko duk. Eta hirugarrenean zer kristo bota behar diat? Ez zekiat oraintxe. Zerbait asmatu beharko nikek. Tira, denbora aurrera zioak, eta hasi egingo nauk. Jendea alde egiten hasi duk, eta noan ni ere kantuan hastera! Hirugarrena bidean pentsatuko diat. Zein huen doinua? Ah bai, habanera. Ale, xintxikizkik!».

IPARRALDEAN lehen aldiz, bertsulari txapelketa / zaharrek eta gazteek... denek elkarrekin kantatzen dugun lehen aldia da. Aspaldian zeuden txapelketa utziak, Alkhat, Jexux Arzallus, Aitor Sarasua... Eta lehen aldiz txapelketan kantatzen dute, Xumaik, Mirenek, Eneritzek, Txatok... Batzuk hasi egin dira, eta besteak itzuli. Eta Xanti, nola ez, itzuli eta hasi egin zara. Eta tartean gu. Itzulitakoen seme, hasiberrien anaia, harro gaude, familia osoa berriz ere elkartu delako. Behingoan denak Iparraldeko sentiarazi gaituzte, eta sentitzen gara. Eta hori bada nahiko txapel, txapelik egongo ez den liga baterako. Beraz...- keta/ berdin da nor pasatzen den, berdin da puntuaketa / aurrera joango dena, iparraldea da eta.

BERTSULARIEN Lagunak, zuekin nahi dut hitzegin / zenbat lan zenbat izerdi, eta zenbat buruko min / elkarte baten sortzeko... biziarazteko, gaur arte irauteko. Izen anitz pasatzen dira burutik bertsu hau kantatzean. Gehiegi, neurririk luzeenean ere kabitzeko. Kepa, Lekuona, Beñat... Hiru puntuei laugarren bat jartzea ere pentsatu dut, baina ortografiak ez dit utzi. Zuei esker kantatzen dugu bertsu ligan. Zuei esker agertuko gara argazkitan. Zuei esker gara, eta izango gara. Zenbat balio du zuen debaldeko lanak! Bertsu liga eredu. Esker mila. ...-gin / lehenik sinetsi zenuten, eta gero amets egin / egun batez bertsu liga, egi bilakatu zedin.
"Eta akabo. Erran beharrekoa bukatu zait, eta oraindik erraten segitu behar. Hirugarren bertsua eskas zait. Bidean pentsatuko nuela pentsatu dut, baina hori, pentsatu bakarrik. Ez dut egin. Berdin du. Datorrena datorrela, hasi eginen naiz. Pentsatu gabe. Bertsuak hitz egin dezala".
Otsailak hiruan hasi, larunbatean bukatu / Urruñatik Baigorrira... Larresorotik Izurara, eta Baionatik Hazparnera bidaiatu du gure bertsu ligak. Eta herri bakoitzean, harrera beroa eta jendetsua izan du. Laster, Nafarroako ligarekin elkartuko da, eta biek batera egingo dute bidea, Donezteberaino. ... barkatu / bidean zer pasako den, ezin nezake k(o/a)ntatu / gaur bezala egingo dut, etorri ahala k(a/o)ntatu.
"Uf! Ze lasaitua. Bukatu dut gaurko lana. Nahi duenak jo dezala txalo. Nahi duenak egin dezala txistu. Bata zein bestea, ez ditut entzungo»


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude