TXALAPARTA
225 orrialde
2.200 pezeta
88 libera
13,22 euro

Xabier Aranburu «Artzai»k euskaratu du Paulo Coelho idazle brasildarraren «O Alquimista», dagoeneko 52 hizkuntzatan irakur daitekeen eleberria. Artzain gazte bat du protagonista. Nekazari apal batzuen seme izaki, apaiz egitea amesten dute bere gurasoek. Baina gazteak munduan ibiltzeko gogoa du, eta badaki noizbait itzuli ahal izateko abiatu beharra duela. Beraz, artzain egin eta artaldea hartuz bideari ekingo dio, ahal duen guztietan ibiltzeko bide ezberdina hautatuz. Egiptora iritsi nahi du, hango piramideetan bizitza aldatuko dion zerbait aurkitzea espero baitu. Bidean, adiskideak, ezusteak, basamortua, amodioa, gudak, herri ezberdinak eta alkimiaren sekretuak ezagutuko ditu. Traba guztien gainetik, aurrera egingo du mutilak, amets bat gauzatzeko aukerak bihurtzen duelako bizitza interesgarri.

150 orrialde
2.250 pezeta
90 libera
13,52 euro

Ipuin eta mikroipuinez osaturik dago Iván Igartuaren lehen liburu hau, Hiria argitaletxearen bidez kaleratu duen «Metroko neska». Umoreak eta ironiak beren lekua duten istorio errealistak dira, haietako batzuetan fantasiazko ukitu nabarmena antzeman badaiteke ere. Irakurle amorratua dugu Iván Igartua, Gasteizen jaio eta Errusian bere ikasketa unibertsitarioak burutu zituen gazte hau, gaur egun «El País» egunkarian idazteaz gainera EHUn errusiera eta errusiar literatura irakasten ari dena. Eta irakurzaletasun horrek bultzata, omenaldi moduko bat eskaini nahi izan die Kafka, Borges, Cortazar, Augusto Monterroso edo Queneau bezalako idazleei berak idatzitako ipuinotan: esate baterako, «Itxuraldaketa», «Zeruan bezala lurrean ere», edo «Parkeen jarraitasuna» izenburua duten istorioetan.

ELKARLANEAN
365 orrialde
2.501 pzta/ 100 lib.
15,03 euro

Elena Odriozolak marraztu eta diseinatu du J. M. Olaizola «Txilikuk» egindako «Axa mixa zilarra agenda-egutegia», izaera bikoitzeko produktu hauxe. Izan ere, agenda bezala erabil daiteke, oharrak jasotzeko koaderno gisa, baina mahai gainean zutik jar daiteke ere. Betiko egutegiek izan ohi duten egitura agertzen duen arren, euskaraz jolas egiteko tresna baliagarria izatea du bere helburu nagusia, horretarako 376 esaera zahar, 200 igarkizunetik gora, ipuinetik bi hamarreko, bost dozena kanta, hogeiren bat hitz-joko, dozenatxo luze bat aho-korapilo eta jolas eta bitxikeria ugari eskaintzen dituelarik. Urteko egun bakoitzerako, igarkizun eta galderaren bat. Erantzuna, berriz, hurrengo egunean dator. Zerbait irakurri nahi dela? Bada, esaera zaharrik, ipuin laburrik, jolaserako kanturik eta abesti zaharrik ez da bertan falta.

ELKARLANEAN
32 orrialde
850 pezeta
34 libera
5,11 euro

Zortzi urtetik aurrerako irakurleei konplexu guztiak uxatzeko erabat aproposa den bilduma dugu Elkarlanean argitaletxearen hauxe. Ana Urkizak idatzi eta Jokin Mitxelenak marraztutako «Betaurrekoak ditut, eta zer?» ipuinean, neskatila batek arazo frankori aurre egin behar izango dio, txikitandik betaurreko handi batzuen atzean begiak gorderik daramatzalako. Begiak okertzen zituen, eta hori zela-eta, betaurrekoak jarri zizkioten. Geroztik, lagunez urri bizi da, bere ikaskideetatik inork ez duelako laubegi batekin ibili nahi. Miope, begioker eta nork daki zenbat horrelako entzun behar izan dituen; eta okerrena dena, ziurtatu diotenez, betaurrekoak eramaten dituen bitartean sekula mutilik ez zaio inguratuko. Egia ote? Sinestekotan dago, harik eta betaurrekoak izateak badituela bere abantailak ere ohartzen den arte.

110 orrialde
1.501 pezeta
60 libera
9,02 euro

Makina bat arrazoi izan dezake pertsona batek erronka jotzeko beste norbaiti, batik bat iraindua sentitzen bada. Hori da dueloa, irain bat garbitzeko bi pertsonen artean egin ohi den borroka, eta arau zehatzak izaten ditu. Baina Luisa Etxenikek «Ejercicios de duelo» liburuan bildu dituen ipuinen protagonistek, arrazoi ezberdinengatik, ezin dute beren arazoaren irtenbidea hain argiro aurkitu. Nola, bere aurrean gertatzen zenaz inoiz ohartu ez eta emazteak betirako alde egin diola onartu beharrean aurkitzen den gizona izanik? Ordaindu beharrekoa jadanik hilik dagoen norbaitek iraganean egin zizun kaltea baldin bada? Tratu txar andana jasan arren, emazte on eta etxekoandre fin izateko hezitu baldin bazaituzte? Halere, izan, badira desafio horiei guztiei aurre egiteko erak, Luisa Etxenikek ironiatsu azaltzen dituen hauexek, kasu.

344 ORRIALDE
2.501 PEZETA
100 LIBERA
15,03 EURO

Berrikuntza ugarirekin datorkigu «Euskaldunon Egunkaria»ren azken «Estilo Liburua», komunikabide horrek bizirik daramatzan hamar urteetan plazaratu duen hirugarrena. Hizkuntzaren arautzeak ekarri dituen berritasunak eta administrazioko eta gainerako alorretako erabilera finkatzeak ekarri dituenak jasotzeaz gain, oraingoan, beraien erronka idazkera berri, samurra eta aberatsa (ez korapilatsua) erdiestea denez, arauen alderdia baino gehiago, idazkuntzaren arloa sakondu nahi izan dute. Bestalde, Euskal Herriko izendegian toponimia estandarizatzeko urteotan ondu den lan sorta bat, munduko herrialdeetako hainbat eta hainbat hiriren izenak, hizkuntzak eta datuak, Euskaltzaindiak Hiztegi Batuarekin egindako ekarpenak ez ezik, esamolde trakets askoren egokitzapenak eta abar aurkituko dituzue bertan.

EREIN
131 orrialde
1.700 pzta./ 68 lib.
10,22 euro

Erein argitaletxearen eskutik kaleratu du Ixiar Rozasek bere azken lana, "Sartu, korrontea dabil" izenburua duen nobela. Parisera doan treneko bagoi batean doazen pertsonaiekin hasten den narrazio honetan, autonomia duten istorio asko tartekatu ditu idazle lasartearrak, nobelan zehar korapilatuz istorio horiek eta beren pertsonaiak. Bere aita Parisen aurkitzeko itxaropen osoa duen etorkin gaztea ezagutuko du irakurleak aurrenik. Maliko gazte horrek aitaren argazki bat baino erreferentzia gehiagorik ez du bere helburua lortzeko, eta harriduraz eta inbidi izpi batez begiratzen die berarekin batera bagoian doazenei, emakume heldu hain erakargarriari, gazte biolinjoleari, liburua irakurtzen ari den gizonari, pentsatuz ea zergatik gainditu behar dituen berak hainbeste oztopo edonora iristeko, zergatik ibili behar duen suge bat bezala arrastaka, bere bizia arriskuan jarriz, mendeetan zehar herrialde handiek behar zuten guztia lapurtu badiote bere herriari. Horrelako galderak egingo lizkieke besteei. Baina Parisera iritsiko dira, eta emakume erakargarriari esker ez dio polizien galdeketari erantzun beharko. Gero, bakoitza galdu egingo da hiri handian, berriro elkartzeko zoria duten arte.